Eiterekero:Yusufu yeyandulira baganda be - Ambassador Institute Bible Story Curriculum

From Door43

Yusufu yeyandulira baganda be

Olubereberye 42-45

Oluvainuma lwa Yusufu okuvunula ekirooto kya Falawo obutufu nti, waali waja kubawo endala ey’amaani, Falawo yafuula Yusufu okuba ow’okubiri mu bufuzi mu Misiri, okulabirira entekateka ey’okutereka emere olw’endala. Ensi ya Kanani Yakobo mweyali, yoona yakosebwa endala eyo. Yakobo bwe yakitegeera nti waaliyo emere mu Misiri, yakoba batabani be nti, “Lwaki mulingagana ku bulingagane? Nawulira nti e Misiri eriyo emere. Muserengete yo mutugulireyo ku mmere tuleme kufa.” Olwo ikumi ku baganda ba Yusufu baaja e Misiri okugula emere. Aye Yakobo tiyatuuma Benjamini muto wa Yusufu ni baganda be kubanga yatya nti akabi kayinza okumutuukaku.

Mpegano Yusufu n’eyali afuga nga n’agabira bona bona emere. Kale baganda ba Yusufu bwe baatuukayo baamuvunamira, n’obweni ku itaka. Amangu nga Yusufu y’akabona baganda be, yabategeera, aye yefuula nga atabaidi yaayogera nabo mu bukambwe yaababuuza nti, “Imwe muviira wa?” Bamuiramu nti, “Tuviira munsi ya Kanani. Tuidye okugula emere.” Waire Yusufu yategeera baganda be, bo tibamutegeera. Male yaidukira ebirooto bye yabalootanga yabakoba nti, “Imwe muli bakeesi! Muidye okubona wa ensi yaife w’ezira bukuumi.” Baamuiramu nti, “Bbe mukama waife. Abaweereza bo baidye okugula emere. Tuli baana ba muntu mulala. Abaweereza bo tuli bantu bamazima, soti bakeesi.” Yabakoba nti, “Bbe! Muidye okubona wa ensi yaife w’ezira bukuumi.” Aye bairamu nti, “Abawereza bo baali ab’oluganda ikumi n’ababiri, batabani b’omuntu mulala aba munsi ya Kanani. Omuto buti ali ni Baaba waife, ate owundi t’akaaliwo.” Yusufu yabakoba nti, “Kiri nga bwe mbakobye: muli bakeesi.” Era bona bona yabasiba okumala enaku isatu. Ku lunaku olw’okusatu Yusufu yabakoba nti, “Nze ntya Katonda, oba mwenda obulamu mukole muti: bwe mubanga muli bantu bamazima leka omu kuimwe asigale wano mu ikomera, abandi muje mutwalire abantu baimwe emere. Aye mutekwa okundeetera muto waimwe male ebigambo byaimwe bikakasibwe olwo muleme kufa.” Kale Simiyoni yaasigala e Misiri era baganda be bairayo eka okutwalira abantu baimwe abayala emere era baategeeza Baaba waibwe Yakobo buli kintu. Mpegano endala yali ekaali y’amaani munsi. Kale bwe baamalawo emere yebaagula e Misiri Baaba waibwe yaabakoba nti, “Muireyo mutugulireyo emere eyindi.” Aye Yuda yaamukoba nti, “Omusaada yatulabula nti, ‘Timuliirayo okumbona okutoolaku nga muto waimwe mumuleese.’ Bwonaatuuma muto waife walala niife twidakuja tukugulire emere. Nze mwene ndakumukuuma era osobola okunvunaana nze mwene kululwe.” Olwo Baaba waibwe, Isirayiri, yaabakoba nti, “Bwekiba nti bwekirina okuba, kale mukikole: mutoole ebimu ku bintu eby’omunsi yaife ebisinga bulungi mu bite munsawo daimwe mubitwalire omusaada oyo nga ekirabo. Mutwale ni muto waimwe yena era muireyo mangu eri omusaada. Era nsaba Katonda ayinza byona byona abawe ekisa mu maiso g’omusada asobole okulekula muganda waimwe Simiyoni era abaikirize okuira ni Benjamini. Aye nze bwenaamufiirwa naaba mmufiirirwa.” Kale abasaada baatwaala ebirabo ni Benjamini. Baayanguwa okuja e Misiri baaja mu maiso ga Yusufu.

Yusufu bwe yabona Benjamini nga ali nabo yaakoba omukuumi w’enumba ye nti, “Twala abasaada bano mu numba yange, ita ekisolo oteketeke ekiwulo; banaalya ninze eky’emisana.” Omukuumi yakola nga Yusufu bwe yamukoba yaatwala abasaada mu numba ya Yusufu. Male yaabaleetera Simiyoni. Omukuumi yatwala abasaada mu numba ya Yusufu, yaabawa amaadi okunaaba ebigere baibwe, era yaawa endogoyi daibwe eisubi. Yusufu bwe yaira eka baamuwa ebirabo bye baamuleetera mu numba baamuvunamira okutuuka kuitaka. Bwe baawebwa emere okulya ku meza ya Yusufu, emere ya Benjamini yaali ningi emirundi etanu okusinga ey’owundi. Kale baanwa era baajaguza naye.

Mpegano Yusufu yaawa omuweereza mu numba ye ebiragiro bino: “Induza ensaawo da basaada bano emere, obungi bwebasobola okwetwika. Era ote ensimbi da buli omu kungulu mu’nsawo ye. Male ote ekikopo kyange ekya feza munsawo ey’omuto walala n’ensimbi d’emere ye.” Era omuweereza yaakola nga Yusufu bwe yamukoba. Nga ab’oluganda baakajaku obuwanvu butono okuva mu kibuga, Yusufu yatuma omuweereza we okub’emereza. Oluvainuma olw’okuzuula ekikopo kya Yusufu munsawo ya Benjamini, ab’oluganda baira eri Yusufu munnaku eningi. Yusufu yakoba oyo eyali aibye ekikopo kye asigale e Misiri afuuke muweereza we era ab’oluganda abandi baireyo eka.

Olwo Yuda yaja eri Yusufu yamukoba nti, “Mukama wange, nkusaba omuweereza wo ndogereku niiwe ekigambo mukama wange. Otasunguwalira muweereza wo, kubanga mubutuufu obuyinza bwo bulinga bwa Falawo mwene. Singa ntuuka eka eri omuweereza wo, Baaba wange, nga omulenzi tali ninze, atenga obulamu bwe butambulira ku mulenzi ono, aidakufa. Abaweereza bo tuidakuleetera omutwe gwa Baaba waife ogwaidula envu okuzikibwa mu buyinike. Nze omuweereza wo nakakasa Baaba nti omulenzi taali tuukaku kabi koona koona. Nakoba Baaba nti, ‘Singa timuiza yoli, omusango gulimbaku obulamu bwange bwona bwona.’ Mpegano nkusaba oleke nze omuweereza wo nsigale wano nfuuke omwidu wa mukama wange, mu kifo ky’omulenzi, oleke omulenzi aireyo ni baganda be.”

Awo Yusufu yali takaasobola kwefuga mu maiso g’abaweereza be boona boona, yaaleekaana nti, “Abaliwo mwena mwena munve mu maiso gange!” Kale ti waali wundi Yusufu bweyeyandulira baganda be. Era yaakuba omulanga ogw’amaani n’aba Misiri baamuwulira. N’ab’omunumba ya Falawo baakiwulira. Yusufu yaakoba baganda be nti, “Ninze Yusufu! Baaba wange, akaaliyo mulamu?” Aye baganda be tibaasobola kumuiramu kubanga baidula entiisa olw’okuba mu maiso ge. Awo Yusufu yaakoba baganda be nti, “Munsemberere.” Nga bamaze okukikola, yabakoba nti, “Ninze Yusufu muganda waimwe, yemwatunda e Misiri! Aye mpegano ti mwewanika mitima era timwesalira musango olw’okuntunda eno, kubanga kyali lwa kulokola bulamu Katonda okuntuma emberi waimwe. Okumala emyaka ebiri buti, waliwo endala munsi, era okumala emyaka etanu egiida tiwaabe kulima na kukungula. Aye Katonda yantuma emberi waimwe okubakuuma obutawaawo kunsi n’okuba lokola mumaani amangi. Kale timwali imwe abaantuma eno aye yali Katonda. Yanfuula okuba Baaba wa Falawo, mukama w’amaka ge gona gona, era omufuzi wa Misiri yona yona. Mpegano mwanguwe muireyo eri Baaba wange, mumukobe nti, ‘Ati mutabani wo Yusufu bw’akoba: Katonda yanfuula okuba mukama wa Misiri yona yona. Ida yendi era tolwa.’” Male yaanwegera muganda we Benjamini era yaalira, ni Benjamini yena yamunwegera nga alira.