Eiterekero:Yusufu ni muka Potifali - Ambassador Institute Bible Story Curriculum

From Door43

Yusufu ni muka Potifali (Okwefuga)

Olubereberye 39:1-23

Mpegano Yusufu yali atwaliibwa e Misiri. Potifali omuMisiri, eyali omulala ku bakungu ba Falawo, nga n’aduumira empingu, yagula Yusufu okuva ku baYisimayiri abaamutwaalayo.

Mukama yaaba ni Yusufu era Yusufu yaakulakulana, yaabanga mu numba ya mukama we omuMisiri. Mukama we bweyabona nga Mukama ali naye era nga Mukama amuwa obuwanguzi mu byona byona bye yali akola, Yusufu yaafuna okuganja mu maiso ge era yaafuuka muweereza we. Potifali yamufuula alabirira amaka ge, era yaamuwa obuvunanizibwa ku bintu bye byona byona. Okuva ku kiseera weyamuweera obuvunanizibwa ku maka ge ni ku bintu bye yalina byona byona, Mukama yawa omukisa amaka g’omumisiri kulwa Yusufu. Omukisa gwa Mukama gwaba ku buli kintu Potifali kyeyalina, mu numba ni kumirimu gye. Kale yaalekera Yusufu obuvunanizibwa ku buli kintu kyeyalina, era nga Yusufu ali mu buvunanizibwa, tiyafangayo ku kintu kyona kyona okutoolaku emere yeyalyanga.

Mpegano Yusufu yali mugimu era nga afanana bulungi, era oluvainuma lwakaseera, muka mukama we yaaganza Yusufu era yaamukoba nti, “Ida osule mu buliri ninze!”

Aye Yusufu yaaloba. Yaamukoba nti, “Nga ndi mu buvunanizibwa mukama wange tiyeralikirira kintu kyona kyona mu numba ye. Buli kintu ky’alina, yakita mu buvunanizibwa bwange. Wazira muntu mu numba eno andi waigulu. Mukama wange tiyanziyiza kintu kyona kyona okutoolaku iwe, kubanga oli mukyala we. Ninza ntya okukola ekintu eky’obunanfusi nga ekyo ninnonoona eri Katonda?” Era waire yadeeba Yusufu buli lunaku, Yusufu yaloba okusula naye waire okumwesembereza.

Lulala Yusufu yaja mu numba okukola emirimu gye nga abakozi abandi bazirawo. Muka Potifali yaamugema ekivalo kye yaamukoba nti, “Ida tuje mu buliri!” Aye yamwewanulaku yaamulekera ekivaalo mu ngalo de yaalumuka mu numba.

Bweyabona nga Yusufu amulekeire ekivaalo kye mu ngalo de naalumuka mu numba, yaayeta abakozi be. Yaabakoba nti, “Muboine, ono omuEbulaniya baamuleeta wano kutufuula byakuzanisa! Aidye wano okungema aye nkubye eduulu. Bw’ampuliire nga nkuba enduulu nfune obuyambi, alese wano ekivaalo kye yaalumuka mu numba.”

Yaatereka ekivaalo kya Yusufu waali okutuusa mukama we bweyaira eka. Male yaamukobera ebigambo bino nti, “Oyo omuidu omuEbulaniya gwewatuleetera, aidye yendi okunfuula eky’okuzaanisa. Aye amangu nga nakatandika okukuba enduulu nfune obuyambi, alese ekivaalo kye wendi yaalumuka mu numba.”

Mukama wa Yusufu bweyawulira ebigambo mukazi we byeyamukoba, nga akoba nti, “Ati omuidu wo bw’ankoze,” yaasuuyirira n’obusungu. Mukama wa Yusufu yaamutwaala yaamuta mu ikomera, mu kifo abasibe  abaasibibwanga kyabazinga yebaasibirwanga.

Aye nga Yusufu ali eyo mu ikomera, Mukama yali naye; yamulaga ekisa, yaamuwa okuganja mu maiso g’omukuumi w’eikomera. Kale omukuumi weikomera yaalonda Yusufu okukulira abo boona boona abaali mu ikomera, era yaaweebwa obuvunanizibwa ku ebyo byona byona ebyakolebwanga yo. Omukuumi w’eikomera tiyafangayo ku ebyo ebyalinga mu buvunanizibwa bwa Yusufu, kubanga Mukama yali ni Yusufu era yaamuwa obuwanguzi mu buli kyeyakolanga.