Eiterekero:Yusufu atundibwa e Misiri - Ambassador Institute Bible Story Curriculum

From Door43

Yusufu atundibwa e Misiri

Olubereberye 37, 39

Mpegano Isirayiri yagonzanga Yusufu okusinga abandi ku balenzi be, kubanga yamuzaalirwa mu bukaire bwe, era yamukolera ekivaalo ekitobeke eino. Baganda ba Yusufu bwe baabona nti Baaba waibwe yagonzanga Yusufu okusinga bo beene, baamukyawa era tibamukobanga kigambo kirungi. Yusufu yafuna ekirooto, era bwe yakoberaku baganda be bayongera okumukyawa. Yabakoba nti, “Muwulire ekirooto kyenaloose: Twabaire tusiba ebinwa by’engaano mu nimiro male amangu ago ekyange kyesimba nga ebinwa ebyaimwe byetoloire ekyange, byakivunamira.” Baganda be bamukoba nti, “Oyenda okutufuga? Bwene onaatufuga?” Era bayongera okumukyaira irala olw’ekirooto kye n’ebyo bye yakoba. Baganda be bamugemerwa ensaalwa, aye Baaba we yakuuma ensonga mu birowoozo bye.

Lulala Isirayiri yatuma Yusufu okuja okuluuta ku baganda be abaali balunda entaama. Bwe baamulengera ewala ng’aida era nga akaali kubatuuka ku b’ekobaana okumuita. Baakobagana nti, “Omulosi wuuyo aida. Tukole tumwite tumusuule mu kiina ky’ensulo tukobe nti ensolo enkambwe yamulya. Olwo tubone ekiriva mu biroto bye.”

Ruben bwe yakiwulira, yagezaku okumununula mu mikono gyaibwe. Yaabakoba nti “Tuleme okumwita. Timuyiwa musayi naire. Mumusuule mu kiina ky’ensulo kino mwidungu aye muleme kumuisaku engalo.” Ruben bino yabikoba amutaase amuizeyo eri Baaba we. Kale Yusufu bwe yatuuka awali baganda be baamwambula ekivaalo kye baamutwaala baamusuula mukiina ky’ensulo. Ku kiseera ekyo ekiina kyali kikalu; timwali maadi. Nga batyamye okulya emere yaibwe baasitula amaiso baabona ekibiina ky’aba Isimayiri nga bava e Giliid. Yuda yaakoba baganda be nti, “Tunaafuna ki bwe tunaita muganda waife nitubwika ku musayi gwe. Tukole tumuguze aba Isimayiri tuleme kumuisaku ngalo, n’okuba muganda waife, musayi era mubiri gwaife.” Baganda be baikiriza. Kale aba Isimayiri bwe baatuuka webali, baganda ba Yusufu baamusikayo mu kiina ky’ensulo baamuguza aba Isimayiri ensimbi abiri, bamutwaala e Misiri.

Ruben bwe yaira ku kiina ky’ensulo naabona nga Yusufu aziramu yayuza engoye de. Yaira eri baganda be yabakoba nti, “Omulenzi azirayo! Buti naayinza kuja wa?” Olwo baaita embuzi baatoola ekivaalo kya Yusufu baakiinika mu musayi gw’embuzi. Baaizayo ekivaalo ekitobeke eri Baaba waibwe bamukoba nti, “Twagaine kino. Kikebere obone oba kya mutabani wo.” Yakitegeera yakoba nti, “Kivaalo kya mutabani wange! Ensolo enkambwe yamulya. Mazima Yusufu yakutulwakutulwa.” Yakobo yaayuza engoye de, yaavaala ebikutiya yaakungubagira mutabani we ennaku ningi.

Buti Yusufu yalinga yatwaalibwa e Misiri. Potifa omu ku bakungu ba Falawo eyali omuduumizi w’empingu, yamugula ku ba Isimayiri abaamutwaalayo. Mukama yaaba ni Yusufu era Yusufu yakulakulana, yabanga mu numba ya mukama we omumisiri. Mukama we Potifa bwe yabona nti Mukama yali naye era nti Mukama yamuwa obuwanguzi mu buli kyeyakolanga, Yusufu yaafuna okuganja mu maiso ga mukama we yamufuula muwereza we. Potifa yamuwa obukulu okulabirira amaka ge, era yamuwa obuvunanizibwa ku bintu bye byona byona. Okuva ku kiseera weyamuweera obuvunanizibwa ku maka ge ni ku bintu bye byona byona Mukama yawa amaka g’omumisiri omukisa olwa Yusufu. Omukisa gwa Mukama gwali ku bintu bya Potifa byona byona ku byali mu numba ni mu nimiro. Kale Potifa yaleka ebintu bye byona byona mu mikono gya Yusufu. Nga obuvunanizibwa buli mu mikono gya Yusufu, Potifa tiyafaayo ku kintu kyona kyona okutoolaku emere yeyalyanga.