Eiterekero:Sulemani asaba Amagezi - Ambassador Institute Bible Story Curriculum

From Door43

Sulemani asaba Amagezi

1 Bakyabazinga 3

Sulemani yalaga okugonza Mukama bweyatambuliranga ku mateeka ga baaba we Dawudi, okutoolaku bweyawangayo sadaaka n’ayokya n’obubaane ku bifo ebyawaigulu. Kyabazinga yaja e Gibiyoni okuwayo sadaaka, kubanga eyo n’ekifo ekyawaigulu ekyali kisinga obukulu, era Sulemani yaawaayo sadaaka lukumi ku kyoto ekyo. E Gibiyoni, Mukama yabonekera Sulemani obwire mu kirooto, era Katonda yaamukoba nti, “Saba ky’oyenda kyona kyona nze nkuwe.” Solomoni yaairamu nti, “Olaze ekisa kingi eri omuwereza wo, baaba wange Dawudikubanga yali wa mazima y’oli era yali mutuukirivu nga mwesimbumu mutima. Ojiire mu maiso n’okulaga ekisa kino y’ali waamuwa mutabani okutyama ku namulondo ye ku lunaku lwene luno. Mpegano ai Mukama Ktonda wange, ofuire omuwereza wo okuba kyabazinga mu kifo kya baaba wange Dawudi. Aye nze nkaali mwana bwana era tiidi kukola buvunanizibwa bwange. Omuwereza wo wuno wano wagati mu bantu be walonda, abantu abaatiikirivu, bangi ino era tibabalika. Kale wa omuwereza wo omutima ogulowooza okufuga abantu bon’okusalawo wagati w’ekirungi n’ekibi. Kubanga ani asobola okufuga abantu bo bano abaatiikirivu?”

Mukama yasuka okubona nti Sulemani kino kyeyasaba. Kale Katonda yaamukoba nti, “Nga bw’osabye kino mukifo ky’obuwangaazi oba okwefunira obugaiga, waire okusaba abalabe bo bafe aye n’osaba okutegeera mukukola obwenania. Njakukola nga bw’osabye. Njakukuwa omutima omugezi era ogutegeera, waleme kubawo eyaali abaire nga iwe, era nga tiwaja kubawo. Ate era, njakukuwa by’otasabye, obugaiga n’ekitiibwa byombi, kibe nti mu bulamu bwo tiwaliba akwenkana mu ba kyabazinga. Era singa otambulira mu majira gange era n’ogondera amateeka gange n’ebiragiro byange nga baaba wo Dawudi bweyakolanga, ndikuwa obuwangaazi.” Male Sulemani yaazuuka, yategeera nga kyali kirooto. Yaairayo e Yerusalemi, yaayemerera mu maiso ga sanduuku ey’amateeka ga Mukama yaawayo sadaaka eyokebwa n’ebiwebwayo eby’obumu. Male yaagabula mu lubiri lwe embaga.

Mpegano bamalaaya babiri baida eri kyabazinga baayemerera mu maiso ge. Omu ku bo yaakoba nti, “Mukama wange nze n’omukazi ono tusula mu numba ndala. Nazaala omwana nga tuli walala. Olunaku olw’okusatu nga nzaire omwana, omukazi ono yena yaazala omwana. Twaali twenka;tiwaali muntu wundi mu numba aye babiri ife twenka. Mu bwiire omwana w’omukazi ono yaafa kubanga yamutendukaku. Kale yaasituka wagati mu bwiire yaantoolaku omwana wange nga nze omuwereza wo ntenduka. Yaata omwana wange ku ibeere lye era owuwe omufu yaamuta ku ibeere lyange. Ekeera bwenazuuka okuyonsa omwana wange, nga afiire! Aye bwenamwetegeereza kunkyo nga butangaire, naabona nti tin’omwana gwenazaala.” Omukazi owundi yaakoba nti, “Be! Omwana omufu n’owuwo;omwana omulamu n’owange.” Era baawakanira mu maiso ga kyabazinga.

Kyabazinga yaakoba nti, “Ono akoba nti, ‘Omwana owange mulamu owuwo n’omufu,’ ate ole akoba nti, ‘Be! Omwana owuwo mufu era owange mulamu.’” Awo kyabazinga yaakoba nti, “Mundetere ekitala.” baaleetera kyabazinga ekitala. Male yaawa ekiragiro nti, “Salamu omwana oyo omulamu ebitundu bibiri owe omu ekitundu kirala n’ekindi okiwe owundi.” Omukazi mwene mwana omulamu yaidula ekisa olw’omwana we, yaakoba kyabazinga nti, “Nkusaba, Mukama wange, muwe omwana omulamu! T’omuita.” Aye ole omukazi owundi yaakoba nti, “Tiwaabe ku nze ni ku iwe anaamutwaala. Mumusalemu ebitundu bibiri!” Awo kyabazinga yaawa okusala kwe: Wa omukazi asooka omwana omulamu. T’omuita; oyo ni maama we.” Isirayiri yoona yoona bweyawulira okulamula kyabazinga kweyakola, baawa kyabazinga ekitiibwa kinene, kubanga baabona nti yalina amagezi okuva eri Katonda okulamula n’obwenkania.