Eiterekero:Setani - Ambassador Institute Bible Story Curriculum

From Door43

Setani

Yobu 1:1-22

Mu nsi eye Uzi, waaliyo omusaada eyayetebwanga Yobu. Omusaada ono tiyaliku kunenezebwa era yali mwesimbu; yatyanga Katonda era yaakyawa obunanfuusi. Yalina abatani musanvu n’abawala basatu, era yalina entaama kasanvu,engamiya enkumi isatu, ente edirima emigogo bikumi bitanu, endogoyi bikumi bitanu, n’abakozi bangi ino. N’eyali omusaada asinga bwatikirivu mu bantu ab’ebuvanduba boona boona.

Batabani be baakolanga embaga mu maka gaibwe mu ngobo, era nga b’eta banina ibwe okulya n’okunwa nabo. Ekiseera ky’amasanu bwebaakimalirizanga, Yobu nga abeeta yaabayukuza. Kunkyo nga bukaali kusaasaana, yaweerangayo buli mwana ekiwebwayo ekyokye, nga alowooza nti, “Tomanya abaana bange bandiba nga baayonoonie baavuma Katonda mu mitima gyaibwe.” Eno yali nkola ya Yobu nga ya lubeerera.

Lulala baMalayika bakungaana okweyandula mumaiso ga MUKAMA, ni Setani yena yaida. MUKAMA yaakoba Setani nti, “Ovawa.” Setani yairamu MUKAMA nti, “Nva kutaalaga mu nsi nga nja emberi bwe ndira einuma.”

Olwo Katonda yaakoba Setani nti, “Olowooziza ku muwereza wange Yobu? Kunsi ezira amufanana; taliku kunenezebwa era mwesimbu, omusaada atya Katonda era akyawa obunanfuusi.”

Setani yairamu nti, “Yobu atya Katonda lwa bwerere? Ye mwene n’amaka ge n’ebintu by’alina byona byona, tiwabisitaku lukomera? Emirimu gy’emikono gye wagiwa omukisa, kyaleetera ebisibo bye okuyala okubuna ensi yona yona. Aye golola omukono gwo okube ebintu bye byona byona, aidakukukolima okutuukira irala mu maiso go.”

MUKAMA yaakoba setani nti, “Wazira nsonga, kale, byona byona by’alina biri mu mikono gyo, aye ku muntu mwene, t’omuisaku lugalo.” Awo Setani y’ava mu maiso ga MUKAMA.

Lulala batabani ba Yobu ni bawalabe baali bajaguza nga banwa omwenge nga bali ew’omulenzi omukulu, Omubaka yaida eri Yobu yaamukoba nti, “Ente dibaire dirima nga n’endogoyi dirya eisubi awo okumpi, abazigu baalumba baaditwaala doona doona. Baatematema abakozi, era ninze zenka awoniewo okuida okukukobera!”

Bweyali nga akali kumala okwogera, omubaka owundi yaida yaakoba nti, “Omuliro gwa Katonda gugwire okuva mu ibanga gwayokya entaama n’abakozi, ninze zenka awoniewo okuida okukukobera!”

Bweyali nga akaayogera omubaka owundi yaida yaakoba nti, “Abakaludaya b’egabyemu ebikunsu bisatu ebirumbagani baayiyikira engamiya do baaditwaala. Baatematema abakozi era ninze awoniewo okuida okukukobera.”

Bweyali nga akaayogera, ate omubaka owundi yaida yaakoba nti, “Batabani bo ni bawala bo babaire bajaguza nga banwa omwenge ewa mukulu waibwe, male amangu ago omuyaga ogw’amaani gwakunta nga gufulumira mu idungu, gwakuba ensonda eina ed’enumba. Yaabagwaku era bafiire. Era ninze zenka asimatuse okuida okukukobera!”

Ku kino, Yobu yaasituka yaayuza ekivaalo kye yaamwa omutwe gwe. Male yaagwa ku itaka yaasinza. Yaakoba nti, “Naida bwerere okuva mu nda ya maama, era bwerere bwe ndija. Mukama yagaba era MUKAMA atwaire; eriina lya MUKAMA litenderezebwe.” Mu bino byona byona, Yobu tiyayonoona n’alumiriza Katonda okusobya.