Eiterekero:Omusaada eyaliku daimoni - Ambassador Institute Bible Story Curriculum

From Door43

Omusaada eyaliku daimoni

Mako 5:1-20

Baasomoka enanda baaja mu kyalo eky’e Gerasene. Yesu bweyava mu lyato, omusaada eyaliku omuzimu omubi yaida nga ava mu kifo ekyamalalo, okwagaana Yesu. Omusaada ono yabanga mu kifo ekyamalalo, era waali tiwakaali yali asobola okumusiba waire n’endegere. Kubanga oluberera yalinga asibibwa emikono n’ebigere ku ndegere, aye yakutulanga endegere n’ebyuma ebyalinga ku bigere bye. Tiwaali yamuyinzanga. Emisana n’obwire yabanga mu kifo ekyamalalo ni mu bisozi nga aleekaana era y’esalanga amabaale.

Bweyalengera yesu nga akaali wala, yaamulumuukirira yaagwa ku mavu ge mu maiso ga Yesu. Yaaleekaanira waigulu n’amaani ge goona goona nti, “Onendezaki, Yesu, Omwana wa Katonda ali waigulu eino? Laira mu liina lya Katonda nti t’ontulugunie!” Kubanga Yesu yamukoba nti, “Va ku musaada ono, iwe omuzimu omubi!”

Olwo Yesu yaamubuuza nti, “Niw’ani?”

Yairamu nti, “Ninze namungi, kubanga tuli bangi.” Era y’egayirira yesu emirundi n’emirundi aleme kubagoba mu kifo ekyo.

Waaliwo ekisibo eky’embiidi nga kinene ekyali kirya ku mbali ku lusozi okumpi awo. Badaimoni b’egayirira Yesu nti, “Tusindike mu mbiidi; tuikirize tidiingiremu.” Yaabawa olukusa, emizimu emibi gyamuvaku gyaja mu mbiidi. Ekisibo ekyalimu embiidi nga enkumi ibiri, daalumuka okuserengeta olusozi daagwa mu nanda yedaafiira.

Abo abaali balunda embiidi dino baalumuka baaja mu kibuga ni mu byalo nga bakitegeeza abantu, era abantu baaja okwelolera ekyaliwo. Bwebaida eri Yesu, baabona omusaada eyalingaku namungi w’emizimu nga atyamye awo, nga avaire bulungi era nga ali mu kutegeera kwe; era baatya. Abo abaakibona baakobera abantu akyatuuka ku musaada eyalingaku badaimoni era bainonola n’ebyatuuka niku mbiidi. Awo abantu b’egayirira Yesu okubaviira mu kitundu kyaibwe.

Yesu bweyali nga anjira mu lyato, omusaada eyalingaku badaimoni y’egayirira yesu okuja naye. Yesu tiyamuikiriza aye yamukoba nti, “Ja ewaimwe eri abamakago obakobere ebingi Mukama by’akukoleire, era nga bwakugemeirwa ekisa. Kale omusaada yaaja era yaatandika okutegeeza mu Dekapolisi nga Yesu bweyamukolera ebingi. Era abantu boona boona baawunikirira.