Eiterekero:Okwetebwa kwa Musa - Ambassador Institute Bible Story Curriculum

From Door43

Okwetebwa kwa Musa

Okuva 3-4

Mpegano Musa yali alunda ekisibo kya muko we Yesero, kabona ow’e Midian, era yaagoba ekisibo, yaakitwaala ewala mu idungu yaatuuka e Koleb, olusozi lwa Katonda. Eyo, malaika wa Mukama yamubonekera mu nnimi ed’omuliro okuva mu kisinde. Musa yaabona nga waire ekisinde kyali kigemye omuliro, kyali tikiya. Olwo Musa yaalowooza nti, “Kanjeyo mbone kino ekyewunisa, lwaki ekisinde tikiya.”

Mukama bwe yabona nga Musa ajiireyo okubona, Katonda yaamweta nga asinziira mu kisinde nti, “Musa! Musa!” Era Musa yaavugira nti, “Ndi wano.” Katonda yaamukoba nti, “Tiweyongera ku sembera toolamu sapatu do, kubanga w’oyemereire kifo kitukuvu.” Male Katonda yaakoba nti, “Ninze Katonda wa Baaba wo, Katonda wa Ibulayimu, Katonda wa Isaka, era Katonda wa Yakobo.” Musa bweyakiwulira, yaabwika ku maiso ge kubanga yatya okulinga ku Katonda. Mukama yaakoba nti, “Bwene bwene mboine okubonaabona kw’abantu bange abali e Misiri. Mpuliire nga basinda olw’okufugibwa obwidu, era kingemyeku. Kale ndidye okubanunula okuva mu mukono gw’aba Misiri n’okubatoolayo munsi eyo mbatwale munsi enungi, engazi, ekulukuta amata n’omubisi. Mpegano okusinda kw’aba Isirayiri kuntuuseku, era mboine nga aba Misiri babatulugunia. Kale mpegano ja, nkutuma eri Falawo, otooleyo abantu bange, aba Isirayiri okuva e Misiri.”

Aye Musa yaakoba Katonda nti, “Ninze ani ayinza okuja eri Falawo okutoolayo aba Isirayiri e Misiri?” Katonda yaamukoba nti, “Nnaaba niiwe, era kano n’akanaaba akabonero y’oli nti ninze nkutumye: bw’oliba nga omaze okutoolayo abantu e Misiri, olisinza Katonda ng’oli ku lusozi luno.”

Musa yaabuuza Katonda nti, “Singa nja eri aba Isirayiri nimbakoba nti, ‘Katonda wa babaaba baimwe, antumye yemuli’ nibambuuza nti ‘eriina lye naani?’ Olwo mbakoba ki?” Katonda yaakoba Musa nti, “Ndi gwendi. Kino ky’onaakoba aba Isirayiri nti, ‘Ndi antumye yemuli.’ Aye ndidi nti kyabazinga wa Misiri taidakubaleka kuja okutoolaku nga awaliriziibwa omukono ogw’amaani. Nolwekyo njakugolola omukono gwange nkonkone aba Misiri nga nkozesa ebyewunio byendibakolamu. Oluvainuma lw’ekyo, alibaleka mwaja.”

Musa yaabuuza nti, “Bwebanaaloba okuikiriza kyenkoba oba okumpuliriza nibakoba nti, ‘Mukama tiyakubonekera’?” Awo Mukama yaakoba Musa nti, “Ekyo ki mu mukono gwo?” Yairamu nti, “Enkoni.” Mukama yaamukoba nti, “Gisuule wansi.” Musa yaagisuula wansi, yafuuka omusota era yaagulumuka. Ate Mukama yaamukoba nti, “Golola omukono ogugeme omukira.” Kale Musa yaagolola omukono yaagugema ate gwairayo okuba enkoni mu mukono gwe. Mukama yaamukoba nti, “Kino kakibe, basobole okwikiriza nti Mukama, Katonda wa Baaba waibwe - Katonda wa Ibulayimu, Katonda wa Isaka era Katonda wa Yakobo - yakubonekera.”

Musa yaakoba Mukama nti, “Ai Mukama, nze tibangaku mwogezi mulungi, okuva eira na buti nga oyogera n’omuweereza wo. Ndogera mpola n’olulimi lwange luzito.” Mukama yaamubuuza nti, “Ani eyawa omuntu omunwa? Ani amufuula omusiwa oba kasiru? Ani amuwa okubona oba obuzibe? Tininze Mukama? Mpegano ja; ndakukuyamba okwogera era ndakukusomesa eky’okwogera.”

Aye Musa yaakoba Mukama nti, “Ai Mukama nkusaba tuma owundi okukikola.” Awo obusungu bwa Mukama bwa buubuukira Musa, yaamukoba nti, “Ate muganda wo Aloni omu Levi? Ndidi nti asobola okwogera obulungi. Era ali munjira, aida okukwagaana, era omutima gwe gunaasanuka okukubona. Oidakwogera naye ote ebigambo mu munwa gwe. Ndakubayamba mwembi okwogera era ndakubasomesa eky’okukola. Anaakwogererawo eri abantu, kinaaba nga ye ali omunwa gwo ate iwe obe nga katonda y’ali. Aye twaala enkoni eno eri mungalo do osobole okugikozesa obubonero obw’amagero.”