Eiterekero:Okwetebwa kwa Ibulamu - Ambassador Institute Bible Story Curriculum

From Door43

Okwetebwa kwa Ibulamu

Olubereberye 12:1-8; 15:1-6

Emyaka mingi oluvainuma lw’amataba waaliwo omusada nga ayetebwa Ibulamu. Yabanga munsi ya Kalani walala ni mukyala we Salayi eyali omugumba.

Mukama yakoba Ibulamu nti, “Va munsi yo, mu bantu bo ni mu numba ya baba wo, oje munsi yendikulaga. Ndikufuula eigwanga eryamaani era ndikuwa omukisa, Ndiyatiikiriza eriinalyo era oliba mukisa. Ndiwa omukisa abo abalikuwa omukisa, era oyo alikukolima, ndimukolima, era abantu bona bona kunsi balifuna omukisa ku lwaiwe.”

Kale Ibulamu yaja nga Mukama bweyamukoba. Ibulamu yalina emyaka nsanvu n’etanu weyaviira e Kalani. Yaja ni mukyala we Salayi, omwana wa koja we Loti, ebintu byebaalina byona byona n’abantu bebaali bafunie mu Kalani. Baasitula okuja munsi ey’e Kanani, era baatuka yo.

Oluvainuma lwokwetoolola munsi eyo Mukama yabonekera Ibulamu yakoba nti, “Ensi eno ndigiwa eizaire lyo.” Kale Ibulamu yazimbirawo Mukama eyamubonekera ekyoto male yayeta eliina lya Mukama.

Oluvainuma olw’ekiseera ekigambo kya Mukama kyaida eri Ibulamu mu kwolesebwa kyakoba nti, “Ibulamu, totya. Ndi engabo yo, ekirabo kyo ekyo muwendo omungi.”

Aye Ibulamu yakoba nti, “Ai Mukama ayinza byona byona, osobola kumpa ki nga nkaali mugumba era oyo alisikira eby’obugaiga byange ni Elyeza ow’e Damasco? Tiwampa baana kale omuwereza mu numba yange n’aliba omusika wange.”

Male ekigambo kya Mukama kyaida yali kyakoba nti, “Omusada ono t’aliba musika wo, aye omwana aida okuva mubiri gwo gwene n’aliba omusika wo.” Katonda yafulumya Ibulamu ku luya yamukoba nti, “Linga wa igulu obale emunyenye bwoba nga osobola okudibala. Lityo eizaire lyo bweliliba.”

Ibulamu yaikiriza Mukama era okwikiriza kwe Mukama yakumubalira okuba obutukirivu.