Eiterekero:Okwambuka n’okuida okw’okubiri - Ambassador Institute Bible Story Curriculum

From Door43

Okwambuka n’okuida okw’okubiri

Ebikolwa 1:3-12

Oluvainuma olw’okubonaa bona kwe, yeyoleka eri abasaada bano era yaabawa obukakafu bwa mirundi mingi okubalaga nti yali mulamu. Yabateeka teeka okumala enaku amakumi ana era yaayogera ku bwaKyabazinga bwa Katonda. Ku mulundi mulala, bweyali nga alya nabo, yabawa ekiragiro kino nti, “Timuva mu Yerusalemi, wabula mulindirire ekirabo baaba wange kyeyasuubiza, kyemwampulira nga ndogeraku. Kubanga Yokana yabatizanga n’amaadi aye munaku ntono muidakubatizibwa n’Omwoyo Omutukuvu.”

Kale bwebaayagaanana, baamubuuza nti, “Mukama, kukiseera kino oja kuizaawo obwaKyabazinga bwa Isirayiri?”

Yaabakoba nti, “Tikyaimwe okumanya ebiseera n’enaku oyo baaba bye yatawo mu buyinza bwe. Aye mulifuna amaani Omwoyo Omutukuvu nga abaiseku; era muliba badulizi bange mu Yerusalemi, ni mu Buyudaya wona wona ni mu Samaliya, era ni kunkomerero y’ensi.”

Bweyamala okwogera bino, yaatwalibwa waigulu nga balingiriire, n’ekire kyamusiikiriza baalema kumubona.

Baali bak’ekaliriza waigulu nga aja, male amangu ago, abasaada babiri abaali mubivaalo ebyeru baayemerera webali. Baabakoba nti, “Abasaada abagaliraya, lwaki mwemerera wano nga mwekaliriza waigulu? Yesu ono mwene abatooleibwaku okuja mu igulu, aliira mu ngeri n’endala nga ye mumubweinemu nga aja muigulu.” Olwo baira eYerusalemi okuva ku lusozi olw’emizaituni, olugendo lwali lutambulirwa sabiiti ndala okuva mu kibuga.

Matayo 24:27-44

Kubanga nga okumyansa okufulumira ebuvanduba bwekubonebwa n’ebugwanduba, n’okuida kw’Omwana w’Omuntu kutyo bwe kuliba. Buli waba kyafiire, awo ensega wedikunganira.

“Amangu nga okubonaabona okw’omumirembe egyo kwakawa, ‘enduba eriirugazibwa, n’omwezi tigulivamu kitangaala kyagwo; emunienie diri gwa okuva mu bwengula n’ebiyiringitira mu bwengula biritengeeta.’”

Ku kiseera ekyo akabonero ak’Omwana w’Omuntu kaliboneka mu ibbanga, n’amawanga gona gona ag’omunsi galibona enaku eningi. Bali bona Omwana w’Omuntu nga aidira ku bire eby’omuibanga, mumaani n’ekitiibwa ekingi. Era alituma baMalaika be n’okufuuwa kw’ekondeere okw’amaani, era bali kungania abalonde be okuva mu mpewo eina, okuva ku luuyi lw’eigulu olusooka okutuuka ku luuyi olundi.

“Mpegano mwegere ku lugero luno olw’omutini: Amangu nga ebibala byagwo bitandise okubeeka n’amakoola gagwo nigatandika okumera, ng’olwo omanya nti akasana akasambya kanaatera. Nga bwekiri kityo, bwemubonanga ebintu bino, mumanyanga nti kiri kumpi ku mulyango. Mbakobera amazima, omujiji guno tiguliwawo nga ebintu bino byona byona bikaali kubawo. Eigulu n’ensi biri wawo aye ebigambo byange tibiriwawo.

“Wazira aidi ebigema ku lunaku olwo oba ku sawa eyo, kababe baMalayika abali mu igulu, kaabe Omwana, wabula oyo Baaba yenka. Nga bwekyali mu mirembe gya Nuwa, kityo bwekiriba ku lwokuida kw’Omwana w’Omuntu. Kubanga mumirembe egy’amataba, abantu baali balya era nga banwa, nga bawasa era nga bafumbiza, okutuuka ku lunaku Nuwa lweyangira mu lyato; era tibaamanya kyali kija kubawo okutuusa amataba bwegaatuuka nigabatwaala boona boona. Kityo bwekiriba ku lwokuida kw’Omwana w’Omuntu. Abasaada baliba babiri mu nimiro; omulala alitwalibwa owundi yaalekebwa. Abakazi babiri baliba basa ensaano, omulala alitwalibwa owundi yaalekebwa.

“Nolwekya mube bulindaala, kubanga timuidi lunaku ki Mukama waimwe lw’aliida. Aye kino mukitegeere: Singa mwene numba yali ategeeire li mu bwire omuibi weyali aja okuida, yali baire bulindaala yalema kuikiriza muibi kumena numba ye. Kale mwena mutekwa okuba obulindaala, kubanga Omwana w’Omuntu aliida ku saawa yemutamusuubira.”