Eiterekero:Okuzaalibwa kwa Isaka - Ambassador Institute Bible Story Curriculum

From Door43

Okuzaalibwa kwa Isaka

Olubereberye 16-21

Mpegano omukazi wa Ibulamu, Salayi, tiyamuzaalira baana. Aye yalina omuweereza omumisiri ayetebwa Agali. Kale Salayi yaakoba Ibulamu nti, “Mukama yansiba okuzaala baana. Kale ja osule n’omuwereza wange obolyawo ninza okukola amaka okubita muye.”

Ibulamu yaaikiriza Salayi kye yakoba. Kale oluvainuma lwa Ibulamu okuba mu Kanani emyaka ikumi, Salayi yatoola omuwereza we omumisiri yamuwa iba okuba mukazi we. Yaasula naye yamuwa enda.

Kale Agali yazalira Ibulamu mutabani yaamuwa eliina Isimayiri. Ibulamu yalina emyaka kinaana na mukaga Agali bwe yazaala Isimayiri.

Ibulamu bwe yaweza emyaka kyenda na mwenda Mukama yamubonekera yaamukoba nti, “Ninze Katonda ayinza byona byona. Tambulira mu maiso gange obuleku okunenezebwa. Ndakukakasa omukago gwange niiwe era ndakukuyaza ino.”

Ibulamu yavunama era Katonda yamukoba nti, “Eri nze, guno n’omukago gwensaze niiwe. Oliba baba w’amawanga mangi. Tokayetebwa Ibulamu wabula Ibulayimu (ekitegeza “Baba w’abangi”), kubanga nkufwire baba wa mawanga mangi. Ensi ya Kanani mpegano mw’olinga omugwira, ndigikuwa okuba eyiyo n’eizaire lyo oluberera era ndiba Katonda waibwe. Guno n’omukago nze gwensaze niiwe n’eizaire lyo: buli musada n’omulenzi alina enaku omunana mwimwe atekwa okukomolebwa.”

Era Katonda yakoba Ibulayimu nti, “Ate mukyala wo Salayi, tokamweta Salayi; eliina lye linaaba Saala. Nnaamuwa omukisa era mazima ndikuwa mutabani okuva muye.”

Ibulayimu yavunama yaseka yayogera yenka nti, “Omusada alina emyaka ekikumi asobola okuzaala mutabani? Saala aliyinza okuzaala omwana kumyaka ekyenda? Era Ibulayimu yakoba Katonda nti, “Wakiri Isimayiri abe wansi w’omukisa gwo!”

Male Katonda yaairamu nti, “Bwekiri, aye mukyala wo Saala alikuzaalira mutabani era olimweta Isaka. Ndisala naye omukago nga gwaluberera eri eizaire lye.”

Mukama yabonekera Ibulayimu nga atyamye ku mulyango gwa wema ye mu kasana wagati. Ibulayimu yasitula amaiso ge yaabona abasaada basatu nga bemereire kumpi naye. Ibulayimu yabaaniriza yaayanguwa okubategekera eky’okulya.

Bamubuuza nti, “Mukyala wo Saala ali wa?” Ibulayimu yairmu nti, “Munda mu wema.” Mukama yakoba nti, “Bwene bwene ndiira y’oli ku kiseera nga kino omwaka ogwida era mukyala wo Saala aliba azaire omwana.”

Mpegano Saala yali awuliriza nga ali ku mulyango mu wema. Yaaseka yenka yaalowoza nti, “Nga mpweiremu eranga mukama wange akairike ninza mpegano okufuna eisanu lino?”

Male Mukama yakoba Ibulayimu nti, “Lwaki Saala asese n’akoba nti, ‘Bwene bwene ndifuna omwana nga mmaze okukairika?’ Waliwo ekilema Mukama? Ndiira y’oli omwaka ogwida ku kiseera ekiragaane era Saala aliba azaire.” Saala yaatya, kale yalimba yakoba nti, “Nze tisese.” Aye Mukama yamukoba nti, “Mazima, osese.”

Mpegano Mukama yaalaga Saala ekisa era Mukama yaakolera Saala ebyo byeyasuubiza. Saala yaafuna enda era yaazaalira Ibulayimu omwana mu bukaire bwe ku kiseera kyene Katonda kye yamusuubiza. Ibulayimu yamutuuma eriina Isaka. Mutabani we bwe yaweza enaku munana Ibulayimu yamukomola nga Katonda bwe yamulagira. Ibulayimu yalin’emyaka kikumi mutabani we bwe yazaalibwa.

Saala yakoba nti, “Katonda ampaire enseko, era buli anakiwuliranga anaansekerangaku. Ani eyandiyinziza okukoba Ibulayimu nti Saala aliyonsa ku baana? Nga ate mmuzaalire omwana mu bukaire bwe.”