Eiterekero:Okuva e Misiri - Ambassador Institute Bible Story Curriculum

From Door43

Okuva e Misiri

Okuva 7-12

Oluvainuma Musa ni Aloni baaja eri Falawo baamukoba nti, “Kino Mukama, Katonda wa Isirayiri, ky’akoba, ‘Leka abantu bange bagolole basobole okunkolera omukolo mu idungu.’” Falawo yaabakoba nti “Mukama n’ani ndyoke mmugondere ndeke aba Isirayiri okuja? Nze Mukama timuidi era tiida kuleka aba Isirayiri okugolola.”

Nolwekyo Aloni yasuula enkoni ye wansi mu maiso ga Falawo n’abakungu be, yaafuuka omusota. Olwo Falawo yaayeta abalaguzi n’abalogo era abaswezi aba Misiri boona baakola ebintu byene ebyo nga bakozesa obukodyo bwaibwe obwekusifu. Buli omu kubo yasuula omwigo gwe gwafuuka omusota. Aye enkoni ya Aloni yamira emiigo gyaibwe. Kyoka omutima gwa Falawo gwakakanala era yaloba okubawuliriza nga Mukama bwe yakoba.

Awo Katonda yaakoba Musa nti, “Omutima gwa Falawo tigusumuluka; alobye okuleka abantu bagolole. Ja eri Falawo, enkyo nga aja mu maadi, mulindire ku lubalama lwa Kiira okumwagaana, era twala enkoni yo mungalo, eyo eyafuuka omusota.” Musa ni Aloni baakola nga Katonda bweyabalagira. Yasitula enkoni ye mu maiso ga Falawo n’abakungu be yaakuba amaadi ga Kiira, era amaadi gona gona gaafuuka omusayi. Ebyenanda ebyali mu Kiira byafa, era omwiga gwawuna bubi ino nti n’aba Misiri baalemwa okunwa amaadi gagwo. Aye abaswezi aba Misiri bona baakola ebintu ebirala ebyo n’obukodyo baibwe obwekusifu, era omutima gwa Falawo gwakakanala. Yaalema okuwuliriza Musa ni Aloni, nga Mukama bwe yakoba.

Olwo Mukama yakoba Musa nti, “Ja eri Falawo omukobe nti, ‘Kino Mukama kyakoba: Leka abantu bange bagolole, basobole okunsinza. Bw’onoloba okubaleka okugolola ndakusindika munsi yo yona yona ekikoligo eky’ebikere.’” Kale Aloni yagolola omukono gwe waigulu w’amaadi g’omu Misiri, era ebikere byavamu byamamira olukalu. Aye abaswezi boona baakola ebintu byene ebyo nga bakozesa obukodyo bwaibwe obwekusifu. Boona baaleta ebikere byamaamira ensi ya Misiri. Falawo yaayeta Musa ni Aloni, yaabakoba nti, “Musabe Mukama atoolewo ebikere mu maiso gange ni mu bantu bange era nnaaleka abantu baimwe baagolola okuja okuwayo sadaaka eri Mukama.” Oluvainuma lwa Musa ni Aloni okuva ewa Falawo, Musa yakowoola Mukama olw’ebikere bye yali aleese ku Falawo. Era Mukama yaakola ekyo Musa kyeyasaba. Ebikere byafa mu mayumba mu mpya ni mu nnimiro. Byakunganizibwa mu ntuumu, byaduuka ensi yona yona. Aye Falawo bwe yabonawo akalembereza, yaakakanaza omutima gwe, era yaaloba okuwuliriza Musa ni Aloni, nga Mukama bwe yakoba.

Kale Mukama yaakoba Musa nti, “Koba Aloni nti, ‘Golola enkoni yo okube enfuufu y’eitaka,’ era mu Misiri yona yona enfuufu enaafuuka obusowera obuluma. Baakikola era Aloni bwe yagolola omukono gwe ogwalimu enkoni naakuba enfuufu y’eitaka, obusowera obuluma bwalumba abantu n’ebisolo. Enfuufu mu Misiri yona yona yafuuka obusowera obuluma. Aye abaswezi bwe bagezaaku okukola obusowera nga bakozesa obukodyo baibwe baalemwa. Abaswezi baakoba Falawo nti, “Guno mukono gwa Katonda.” Aye omutima gwa Falawo gwali mukakanavu, era tiyabawuluriza nga Katonda bwe yakoba. Ekyairaku Mukama yasindika ekikoligo ky’ensowera mu Misiri n’ekikoligo ekyaita ebisibo byaibwe. Amayute agaluma eino gaabutuuka ku bantu bona bona era Katonda yaasindika ekire eky’omugozi ekyasaniawo enimiro daibwe. Ekyairaku, ekikoligo ky’enzige daalya buli kimera mu Misiri. Oluvainuma lw’enzige ekizikiiza kya buutikira Misiri ennaku isatu. Ku buli kimu ku bikoligo bino, Falawo yasuubizanga Musa nti abantu basobola okuja, aye buli kimu lwekyakomanga, Falawo yakyusanga ekirowoozo kye yaaloba okubaleka okuja.

Mpegano Mukama yali akobye Musa nti, “Njakuleetayo ekikoligo ekindi kirala ku Falawo ni ku Misiri. Oluvainuma lw’ekyo, anaabaleka okuva wano, era bw’anaakikola aidakubagobera irala.” Kale Musa yakoba nti, “Kino Mukama kyakoba nti, ‘Nga wagati mu bwire nnaatabaala Misiri yona yona. Buli mwana muberi omulenzi mu Misiri aidakufa okuva ku mulenzi omuberi owa Falawo oyo atyama ku namulondo, okutuuka ku muwala omuzaana aliku lubengo lwe, niku biberi eby’ente byona. Walibawo emiranga egyamaani mu Misiri yona yona okusinga egyali gibairewo oba egyo egiribawo. Aye mu ba Isirayiri tiwaliba waire embwa eriboigolera omuntu oba ensolo.’ Olwo mulitegeera nti Mukama ayawula wagati wa Misiri ni Isirayiri. Bano abakungu bo boona boona baliida yendi nga bavunama mu maiso gange nga bakoba nti, ‘Muje iwe n’abantu boona boona abakugoberera!’ Oluvainuma lw’ekyo ndi golola.” Male Musa yaava awali Falawo nga asuyiriire n’obusungu.

Awo Musa yaayeta abakaire ba Isirayiri boona boona yaabakoba nti, “Muje mangu mulondemu ebisolo byemunaasalira amaka gaimwe eby’entaama y’okubitaku. Mutoole ebikoola eby’obuwoowo mubiinike mu musayi mu kalayi musiige omusayi waigulu ni kumbali ku myango gyemiryango. Tiwaba muntu yena yena afuluma mu mulyango gwe okutuusa kunkyo. Mukama bw’anaatabaala ensi okwita aba Misiri anaabona omusayi waigulu ni kumbali ku miyango era anaabita ku mulyango ogwo, era taikirize oyo asaniawo okungira amayumba gaimwe okubaita.”

Wagati mu bwire Mukama yaita ababeri n’ebiberi mu Misiri, okuva ku muberi wa Falawo, eyatyamanga ku namulondo, okutuuka ku muberi w’omusibe eyali mu ikomera, n’ebiberi by’ebisolo byona. Falawo n’abakungu be boona boona n’aba Misiri baazuuka mu bwire era waabaawo ebiwoobe mu Misiri, kubanga tiwaali numba omutaali afiire. Mu bwire Falawo yayeta Musa ni Aloni yaabakoba nti, “Mutyo musituke, muve ku bantu bange, imwe n’aba Isirayiri! Muje musinze Mukama nga bwe mwasaba. Mutwale ebisibo byaimwe nga bwe mwakoba, mugolole. Era munsabire omukisa.” Aba Misiri baakuburiza abantu okwanguwa okuva munsi. Bakoba nti, “Bwekitaba kityo twidakufa!” Aba Isirayiri baasaba aba Misiri ebinere n’ebikomo bya feza ni zabu n’ebivalo nga Musa bweyabalagira. Mukama yagonza emitima gy’aba Misiri era baawa aba Isirayiri buli ky’ebabasaba, kale baanaga aba Misiri.