Eiterekero:Okununulwa okw’okunanda emyufu - Ambassador Institute Bible Story Curriculum

From Door43

Okununulwa okw’okunanda emyufu

Okuva 14-15

Bwe baakobera kyabazinga w’eMisiri nti abantu bagoloire, Falawo n’bakungu be baakyusa ebiroowozo byaibwe ku bo, baakoba nti, “Tukoze ki? Tulese aba Isirayiri bagolola era twafiirwa emilimu gyaibwe!” Nolwekyo Falawo yalagira baatekateka egaali ye yaaja n’eijje lye. Yatwala lukaaga ku magaali agasinga mu bulungi, walala n’amagaali g’omu Misiri agandi gona gona, nga gona gona galiku abajaasi.. Mukama yakakanaza omutima gwa Falawo, kyabazinga wa Misiri, kyamuleetera okugoba aba Isirayiri abaali batambuza amaani.

Falawo bwe yasemberera aba Isirayiri basitula amaiso, era baabona nga aba Misiri babatuuseku nga babagoba. Aba Isirayiri baawulira okutya kungi era baalirira Mukama. Bakoba Musa nti, “Wabona nga e Misiri tiyali magombe male otuleete okufiira mu idungu? Titwakukoba nga tuli e Misiri nti, ‘Tuleke tube baweereza ba ba Misiri’? Kyalibaire kirungi ife okuba abaweereza ba ba Misiri okusinga okufiira mu idungu!” Musa yakoba abantu nti, “Timutya. Mugume muidakubona okununulwa Mukama kw’anaabakolera leero. Aba Misiri bemubona leero timuliirayo kubabonaku. Mukama ajakubalwanirawo; mwetaaga kuba nga timukyuuka.”

Awo Mukama yaakoba Musa nti, “Lwaki ondirira? Koba aba Isirayiri baje mu maiso. Situla enkoni yo ogolole omukono gwo waigulu w’enanda okwawula amaadi, aba Isirayiri basobole okubita mu nanda ku itaka eikalu. Aba Misiri banaategeera nti ninze Mukama bwennaatwaala ekitibwa okubita mu Falawo, mu magaali ge, n’abavuzi b’embalasi de.” Awo malaika wa Katonda, eyakulemberanga eijje lya Isirayiri yaava mu maiso yaabaira einuma. Omulongoti gw’ekire gwona gwava mu maiso gwab’esimba einuma, gwaba wagati w’amajje, erya Isirayiri n’erya Misiri. Mu bwire bwona bwona ekire kyaleeta ekizikiiza ku luuyi olulala ate kyaleeta ekitangaala ku luuyi olundi; kale tiwaali luuyi lwa semberera lundi obwire bwona bwona. Male Musa yaagolola omukono gwe waigulu w’enanda era obwire obwo bwona bwona Mukama yayawula enanda nga akozesa empewo ey’amaani. Awaali enanda waaba olukalu. Amaadi gayawulwa aba Isirayiri baabita mu nanda ku lukalu, nga waliwo ebisenge by’amaadi ku mugoda ni ku gulya.

Aba Misiri baabagoba era embalasi da Falawo n’amagaali ge, n’abavuzi ba do baabagoberera mu nanda. Mu sawa edisemba mu bwire Mukama yayima mu mulongoti gw’omuliro n’ekire yaalingirira eijje lya ba Misiri yaalisuulamu okuwuzika. Yaleetera namuziga d’amagaali okuvaku baafuna ebizibu okugavuga. Olwo aba Misiri baakoba nti, “Katuviire aba Isirayiri! Mukama alikubalwanirawo nga alwanisa Misiri.”

Awo Mukama yaakoba Musa nti, “Golola omukono gwo waigulu w’enanda amaadi galyoke gairewo gabuutikire aba Misiri n’amagaali gaibwe, n’abavuzi b’embalasi.” Musa yagolola omukono gwe waigulu w’enanda era nga bukya enanda yairawo mu kifo kya yo. Aba Misiri baali balumuka okuguviira, era Mukama yaabeeyera mu nanda. Amaadi gairawo gaabuutikira amagaali n’abavuzi bembalasi era n’eijje lya Falawo lyona lyona erya goberera aba Isirayiri mu nanda. Tiwaali mulala eyawona. Aye aba Isirayiri baabita munanda ku lukalu nga waaliwo ebisenge by’amaadi ku mugoda ni ku gulya. Ku lunaku olwo Mukama yalokola Isirayiri okuva mu mikono gya ba Misiri, era Isirayiri yaabona emirambo gy’aba Misiri ku lubalama. Era aba Isirayiri bwe baabona amaani ga Katonda ag’ekitalo, nga galagibwa ku ba Misiri, abantu baatya Mukama era baamutaamu obwesigwa bwaibwe ni mu Musa omuweereza we.

Olwo Musa n’aba Isirayiri baayembera Mukama nti, “Nnaayemberanga Mukama, kubanga agulumizibwa ino. Embalasi n’omuvuzi wayo abiswire mu nanda. Mukama n’amaani gange era n’olwemba lwange; afuuse obulokozi bwange. Ye ni Katonda wange era n’amutenderezanga Katonda wa Baaba wange era nnaamugulumizanga. Mukama mulwani; Mukama n’eliina lye. Amagaali ga Falawo n’eijje lye abiswire mu nanda. Abakungu ba Falawo abasinga obukulu baafiira mu Nanda Emyufu.”