Eiterekero:Okugwa kw’omuntu - Ambassador Institute Bible Story Curriculum

From Door43

Okugwa kw’omuntu

Olubereberye 3

Mukama Katonda yasimba olusuku omwali emiti mingi mweyata Adam ni Kaawa. Wagati mu lusuku waaliwo omuti ogw’obulamu n’omuti ogw’okutegeera ekirungi n’ekibi. Mukama Katonda yalagira omuntu nti, “Osobola okulya kumuti gwona gwona, aye tolyanga ku muti ogw’okutegeera ekirungi n’ekibi; kubanga lwoligulya mazima olifa.”

Mpegano omusota gwali mukalabakalaba okusinga ensolo edindi dona dona Katonda deyatonda. Omusota gwabuuza omukazi nti, “Bwene bwene Katonda yakobanti, ‘tolyanga ku muti gwona gwona ku giri mu lusuku?’”

Omukazi yairamu omusota nti, “Tusobola okulya ku miti egiri mu lusuku aye Katonda yakobanti, ‘Timulyanga ku muti oguli wagati mu lusuku, era timugugemangaku kubanga mulifa.’”

Omusota gwakoba omukazi nti, “Mazima timulifa kubanga Katonda aidi nti bwe muligulyaku amaiso gaimwe galizibuka era muliba nga Katonda okutegeera ekirungi n’ekibi.”

Omukazi bwe yabona nga ekibala ky’omuti kyali kirungi okulya eranga kisanusa okubona eranga kirungi olw’okufuna amagezi yakinoga yakirya. Era yawaaku niiba eyali naye era yena yakirya. Male amaiso gaibwe bombi gaazibuka era olwo baategeera nti baali bwerere. Kale baatunga amakoola g’emiti okwebwikaku.

Male kunkyo omusada ni mukazi we baawulira ebigere bya Mukama Katonda nga atambula mu lusuku baamwekweka mu miti egyali mu lusuku. Aye Mukama Katonda yayeta omusada nti, “Oli wa?”

Yairamu nti, “Nkuwuliire mu lusuku era ntiire kubanga ndi bwerere kale nekwese.”

Katonda yamubuuza nti, “Ani eyakukobye nti oli bwerere? Oliireku ku muti gwenakulagira obutalyaku?”

Omusada yakobanti, “Omukazi gwe wampa neyampaire ekibala era naakirya.”

Male Mukama Katonda yabuuza omukazi nti, “Okoze ki Kino?”

Omukazi yamuiramu nti, “Omusota gwanimbye era nalya.”

Kale Mukama Katonda yakoba omusota nti, “Kubanga okoze kino okolimiirwa okusinga ensolo dona dona. Onewalulanga kundayo era onalyanga enfufu enaku do dona dona. Era ndakutawo obulabe wagati wo n’omukazi era wagati w’eizaire lyo n’erirye. Omwaana we anaakubetentanga omutwe gwo ate iwe onaamukontanga ekigere kye.”

Katonda yakoba omukazi nti, “Ndaku kwongera obulumi nga ozaala. Onaazaliranga mu bulumi. Okwegomba kwo kunabanga eri balo era anaakufuganga.”

Katonda yakoba Adamu nti, “Kubanga owuliriza mukazi wo walya ku muti gwenakulobera, eitaka likolimiirwa ku lulwo. Mu kukola okw’obulumi onaalifunamu ky’olya obulamu bwo bwona bwona. Linaameranga amawa era onaalyanga ebimera by’enimiro. Mukugezimula mwonaalyanga okutuusa lwolirayo muitaka kubanga mulyo mwewava era kubanga olinfufu era munfufu mw’oliira.”

Mukama Katonda yabakolera ebivaalo mu luwu yabavaza. Era Mukama Katonda yakobanti, “Omuntu afuuse nga omu kwife okutegeera ekirungi n’ekibi. Aleme kwikirizibwa okulya ku muti ogwo bulamu abe mulamu emirembe n’emirembe.” Nolwekyo Mukama Katonda yamugoba mu lusuku lwa Edeni yatawo bamalaika babiri okukuuma omulyango gwo lusuku n’okukuuma enjira etuuka kumuti ogw’obulamu.