Eiterekero:Okubatizibwa - Ambassador Institute Bible Story Curriculum

From Door43

Okubatizibwa

Ebikolwa 2:22-41

“Abantu ba Isirayiri, muwulirize kino: Yesu omunazalesi yali omuntu Katonda gweyabawereza nga abita mu byamagero, ebyewunio, n’obubonero, Katonda byeyabakolamu nga abita mu ye, nga imwe beene bwemukiidi. Omusaada ono yabawebwa nga ekigendererwa kya Katonda kye yali amaze okusalawo era kyali mu kumanya kwa Katonda; era imwe, nga muyambibwaku abantu abananfuusi, mwamwita nga mumukomerera ku musalaba. Aye Katonda yamuzuukiza mu bafu, yaamusumulula okuva mu bulumi obw’okufa, kubanga tikyasoboka okufa okumwesibaku.

“Dawudi yamwogeraku nti, ‘Nabonanga Mukama nga andi mumaiso. Kubanga andi kumukono gwange ogulya, tisagasagane. Nolwekyo omutima gwange musangaavu n’olulimi lwange lusagamba; omubiri gwange gwona gunaawumulira mu kusuubira, kubanga t’olindeka mu nsi ey’abafu,t’olileka omutukuvu wo okutuuka okuvunda. Ondaze enjira ed’obulamu; olindiduza eisanu mukubawo kwo.’

“Ab’oluganda, nsobola okubakobera n’obuvumu nti daada waife Dawudi yafa era yaazikibwa, era entaana ye eriwo na buti. Aye yali nabbi era yakitegeera nti Katonda yamusuubiza nga yerayirira nti, alilonda omu ku baidukulu be okuba ku namulondo ye. Bweyabona ebyali mu maiso, yayogera ku kuzuukira kwa Kristo, nga akoba nti tiyalekebwa mu ntaana era n’omubiri gwe tigwaabona kuvunda. Katonda yazuukiza Yesu ono era twena twena tuli badulizi ba nsonga eno. Eyagulumizibwa okuba ku mukono gwa Katonda ogulya, yafuna omwoyo omutukuvu eyasuubizibwa okuva ku oyo Baaba era yaafulumya ebyo buti byemubona nibyemuwulira. Kubanga Dawudi tiyayambuka muigulu atenga yakoba nti, “Mukama yakoba Mukama wange nti, ‘Tyama ku mukono gwange ogulya okutuusa lwendifuula abalabe bo okuba entebe ey’ebigere byo. Kale leka Isirayiri yona yona ekitegeere nti: ono Yesu gwemwakomerera, Katonda amufuire okuba Mukama era Kristo.”

Abantu bwebaawulira bino, baawulira nga ekintu kibasala okutuuka kumitima gyaibwe baakoba Petero n’abayigirizwa abandi nti, “Ab’oluganda,tukole ki?”

Petero yaairamu nti, “Mwenenie mubatizibwe buli omu ku imwe, mu liina lya Yesu Kristo olw’okusoniyibwa kw’ebibi byaimwe. Era mufune ekirabo eky’OMWOYO OMUTUKUVU. Ekisuubizo kyaimwe n’abaana baimwe n’abo abali ewala - ky’abo boona boona Mukama Katonda waife baliyeta.”

Yabalabula nga akozesa ebigambo ebindi bingi; era yaabegayirira nti, “Mwewonie omulembe guno omunanfuusi.” Abo abaikiriza obubaka bwe baabatizibwa, era kumpi enkumi isatu baayongerwa ku muwendo gwaibwe olunaku olwo.