Eiterekero:Obutonde Bw’omuntu obwagwa - Ambassador Institute Bible Story Curriculum

From Door43

Obutonde Bw’omuntu obwagwa

Olubereberye 19:1-26

BaMalayika bombi baatuuka e Sodomu ku kazimyezimye, era Luti yali atyamye ku mulyango ogw’ekibuga. Bweyababona yaasituka okubasangaaza era yaavunama n’ekyeni kyakona ku itaka. Yaabakoba nti, “Bakama bange, mbasaba mukyuke mungire mu maka g’omuweereza waimwe. Musobola okunaabaku kubigere mwasula wano male muwuune muje.” Baamukoba nti, “Be, titwida kusula mu kibuga.”

Aye yab’egayirira ino era baikiriza okuja ewuwe. Yabafumbira emere ey’omugati ogutalimu kizimbulukusa, era baalya. Nga bakaali kuja kutenduka, abasaada boona boona okuva mu bitundu byona byona eby’ekibuga Sodomu abavubuka n’abakaire b’etoloola enumba. Baayeta Luti nga bamubuuza nti, “Abasaada abakukyaliire obwire buno baliwa? Batuwe tusobole okusula nabo tubakozese.”

Luti yaafuluma okuja okwogera nabo, yaaigalawo oluigi einuma we yaabakoba nti, “Be bana, muleke kukola kikolwa kyabunanfusi nga ekyo. Mubone, nina bawala bange babiri emberera kambabawe mubakole kyona kyona kyemusiima. Aye timukola kintu kyona kyona ku basaada bano kubanga baidye okuba mu bukuumi bw’enumba yange.”

Baamukoba nti, “Tuviire.” baakoba nti, “Omuntu ono yaida wano nga omugwira aye mpegano ayenda kwefuula mulamuzi waife! Tuida kukukolaku nokusinga bo.” B’eyongera okunigiriza Luti baamusemberera baje okumena oluigi.

Aye abasaada abaali munda baafuluma baasika Luti baamuiza mu numba, era baigalawo oluigi. Male baaleeta ku basaada abaali ku mulyango gw’enumba, abato n’abakulu obuzibe baalema kubona mulyango.

Abasaada bombi baakoba Luti nti, “Wano olina wo abantu bo abandi nga abako oba ba namuwala oba omuntu owundi ow’enumba yo? Bafulumye ekibuga, kubanga tuja kuzikiriza ekifo kino. Obukyayi bwa Mukama eri abantu bakyo bubitiriire era atutumye okukizikiriza.”

Kale Luti yaaja yaayogera ni bako be abaali boogereza bawala be. Yaabakoba nti, “mwanguwe okufuluma ekifo kino kubanga Mukama anaatera okuzikiriza ekifo kino!” Aye abako be baalowooza nti yali asaaga.

Nga obwire busaasaana, baMalayika baakubiriza Luti nga bamukoba nti, “Yanguwaku! Twala mukaziwo ni bawalabo abali wano, kubanga muyinza okweyebwawo nga ekibuga kibonerezebwa.”

Bweyali nga asikatiramu, abasaada baabagema emikono, ye,mukyala we ni bawala be bombi baabafulumya mu kibuga, kubanga Mukama yabagemerwa ekisa. Amangu nga baakamala okubafulumya, omu kubo yaakoba nti, “Mulumuke muwone! Timulinga inuma, era timwemerera nga muli ku itale kubanga muyinza okweyebwawo!”

Aye Luti yaabakoba nti, “Be bakama bange mbegayirire! Omuweereza waimwe ofunnie okuganja kunene mu maiso gaimwe, era mundaze ekisa kingi ino bwemuwoniiza obulamu bwange. Aye tisobola kulumukira mu nsozi; ekizibu kino kiida kuntuukaku, nfe. Bona, waliwo ekibuga wano ekiri okumpi wensobola okulumukira era kitono. Kanumukire eyo- kabuga katono, tibwekiri? Olwo obulamu bwange buwonezebwe.” Yaamukoba nti, “Kale,ndakuikiriza okusaba kuno kwona; tiida kuvuunika kibuga ekyo ky’oyogeraku. Aye yanguwa okulumukirayo, kubanga tiibe na kyenkola nga okaali kutuukayo.” (Eyo n’ensonga lwaki ekibuga ekyo kyayetebwa Zoola.) Luti weyatuukira e Zoola, enduba yali etandise kwaka munsi. Olwo Mukama yaatonesa amafuta agayaka omuliro ku Sodomu ni ku Gomola – nga gava mu igulu eri Mukama. Amakulu nti yavuunika ebibuga ebyo walala n’eitale lyona lyona, nga kwotaire n’abaabirimu boona boona – n’eisubi eryali munsi eyo. Aye muka Luti yalinga einuma, yaafuuka empagi y’omuunu.