Eiterekero:Obulokozi - Ambassador Institute Bible Story Curriculum

From Door43

Obulokozi

Ebikolwa 16:16-34

Lulala bwetwali tuja mu kifo eky’okusaba, twayagaana omuwala omuidu eyaliku omuzimu gweyakozesanga okulagula. Era yafuniranga bakama be esente ningi okuva mu kulagula. Omuwala ono yatugoberera nga tuli ni Paulo ng’atuleekanira nti, “Abasaada bano bawereza ba Katonda ali waigulu eino, abali kubalaga enjira ey’okulokoka .” Kino yakikolera enaku ningi. Kunkomerero Paulo yatabulwatabulwa ino nti yakyukira omuzimu yaagukoba nti, “Muliina erya Yesu Kristo, nkulagira omuveku!” Ku kiseera kyene ekyo, omuzimu gwamuvaku.

Beene muwaala ono omuidu bwebaategeera nga omukisa gwaibwe ogw’okufuna sente gufiire, baagema Paulo ni Silas baabawaludania baabatwaala mu katale mu maiso ga ab’bobuyinza. Baabaleeta mu maiso g’abalamuzi era baakoba nti, “Abasaada bano baYudaya, aye bali kusasamaza ekibuga kyaife nga basomes obulombolombo obutaikirizibwa ife abaloma okukola oba okugoberera.”

Abantu bangi b’egaita mu kulumba Paulo ni Silasi, era abalamuzi baalagira bambulwe era bakubibwe. Oluvainuma olw’okutulugunizibwa obubi eino, baasuulibwa mu ikomera, era omuserikale w’eikomera yaalagirwa abakuume nga abegendereza. Bweyawebwa ebiragiro ebyo, yaabata mu kisenge ky’eikomera eky’omunda era yaabasiba ebigere ku bikondo.

Kyali nga mu buire wagati, Paulo ni Silasi baali saba era nga bemba enemba ed’okutendereza Katonda, era nga abasibe babawuliriza. Amangu ago waabawo musisi ow’amaani eyayuguumya omusingi ogw’eikomera. Ku mulundi mulala endigi d’eikomera deigula era endegere da buli muntu daasumuluka. Omuserikale w’eikomera yaazuuka, era bweyabona nga endigi d’eikomera ndigule, yaasowola ekiso kata yeite kubanga yalowooza nti abasibe boona boona baali batolose. Aye Paulo yaamuleekanira nti, “Tiwekola kabi! Twena twena tuliwo!”

Omuserikale yaayesa amataala yaangira yaagwa mu maiso ga Paulo ni Silasi nga akankana. Awo yaabafulumya yaababuuza nti, “Ba Sebo nkole ntya okulokoka.”

Baamuiramu nti, “Ikiririza mu Mukama Yesu, oidakulokolebwa– iwe n’amaka go.” Baamala baamubuulira ekigambo kya Katonda neri abandi abaali mu numba ye. Ku saawa eyo ey’omubwiire,omuserikale w’amakomera yabatwaala yaabanaaza ebiwundu byaibwe; male amangu ago ye n’amaka ge baabatizibwa. Omuserikale w’amakomera yaabatwaala mu maka ge yaabasembeza; yaidula eisanu kubanga yatuuka okuikiririza mu Katonda– ye n’amaka geboonaboona.