Eiterekero:Nuwa - Ambassador Institute Bible Story Curriculum

From Door43

Nuwa

Olubereberye 6-9

Mukama yabona nga obubi bw’omuntu bwebwali bweyongeire kunsi era nga ebirowoozo by’omutima gwe byali bibi ekiseera kyona kyona. Mukama yaanakuwala kubanga yatonda omuntu okuba kunsi era omutima gwe gwaidula obulumi. Kale Mukama yaakoba nti, “Njakusaaniawo omuntu okuva kunsi kubanga mpulira ennaku olw’okumutonda.” Kyoka Nuwa yafuna okuganja mu maiso ga Katonda.

Nuwa yali musada mutuukirivu, ataaliku kyakunenezebwa mu bantu ab’omukiserera kye, era yatambulanga ni Katonda. Nuwa yalina batabani basatu: Semu, Kamu, ni Yafesi.

Katonda yakoba Nuwa nti, “Njakusaaniawo abantu ab’ensi kubanga ensi eidwiire obukambwe olwa bo. Kale kola eryato mu muti, fuuti bina n’atanu (450) obuwanvu, fuuti nsanvu na itanu (75) obugazi ni fuuti ana na itanu (45) obugulumivu. Lisaana okubamu emyaliiro esatu obugulumivu n’olwigi mu mbali n’akasulya. Njakuleeta amataba ag’amani kunsi agalisaaniawo buli kiramu kunsi. Aye ndisalaniiwe omukago. Oliingira mu lyato ni mukazi wo, batabani bo ni bakazi baibwe n’ekisaada n’ekikazi okuva mu buli kika kya nsolo, bikuumibwe nga biramu niiwe. Olina okusiba buli kika kya mere, imwe n’ensolo okulya.” Nuwa yaakola buli kintu nga Katonda bwe yamulagira.

Male Katonda yakoba Nuwa nti, “Ingira mu lyato iwe n’amaka go gona gona kubanga nkuzwire okuba omutuukirivu mu mulembe guno. Munnaku musanvu okuva buti njakuleeta ikendi kunsi okumala enaku amakumi ana, omusana n’obwire, era njakusaaniawo buli kiramu kyenatonda.” Era Nuwa yakola ebyo byona byona Mukama byeyamulagira.

Nuwa n’amaka ge bangira eryato era na buli bibiri kunsolo n’ebinoni byaida eri Nuwa byangira mu lyato. Oluvainuma olw’enaku omusanvu, Mukama yaigala omulyango gw’eryato, ikendi yatandika okutoona n’ensulo d’ensi d’eigula. Ikendi yatoona okumala enaku amakumi ana, omusana n’obwire.

Amataba bwegaatandika okubira, gaasitula eryato waigulu okuva ku itaka lyalera ku maadi. Buli kiramu ekyali kunsi nga kiisa, kyafa, aye Nuwa n’amaka ge n’ensolo edali nabo, mu lyato byalokolebwa.

Ikendi bwe yakya amaadi gaatandika okwika okuva kunsi obutasibamu era kunkomero y’enaku kikumi naatanu, eryato lyaika kungulu ku lusozi olwetebwa Alalat. Oluvainuma lw’enaku amakumi ana, Nuwa yaigulawo dirisa gyeyakola waigulu ku lyato, yasindika eiyemba kuluya. Eiyemba lyalemwa okubona ekifo aw’okwika kubanga amaadi gaali gakaali mangi. Oluvainuma olw’enaku edindi musanvu, ate Nuwa yasindika eiyemba kuluya era lyaira n’eikoola eito mu munwa. Yalinda enaku edindi musanvu ate yalisindika kuluya, aye ku luno tiryaira. Olwo Nuwa yategeera nti amaadi gaali gajiire.

Oluvainuma lw’ensi okukala, Katonda yakoba Nuwa nti, “Muve mu lyato iwe, amaka go, n’ensolo dona dona disobole okwaala munsi.” Nuwa yazimbira Mukama ekyoto yawayo sadaka. Mukama yakoba nti, “Tirikiiramu okusaaniawo ebiramu byona byona n’amataba.” Mukama yatawo oluna muibanga nga ekiidukizo ky’ekisuubizo kyeyakola obutasaaniawo nsi ate n’amataba. Olwo Mukama yawa Nuwa n’abaana be omukisa, yakoba nti, “mubale, mweyongere mu bungi mubune ensi.”