Eiterekero:Nekemiya - Ambassador Institute Bible Story Curriculum

From Door43

Nekemiya

Nekemiya 1-6

Ebigambo bya Nekemiya. Bwe nali nga nkaaba mu kifo eky’okwekwekamu eky’eSusa, Kanani, omu ku baganda bange, yava e buyudaya nga alin’abasaada abandi, era naababuuza ku bayudaya abali bakaasigairewo mu buwanganguse, era ni ku Yerusalemi. Baankoba nti, “Abo abawonawo mu buwanganguse bali mu bizibu bingi ni mukunoomebwa. Ekisenge kya Yerusalemi kya menebwa n’endigi dakyo dayokebwa omuliro.” Bwenawulira ebintu bino, natyama wansi naalira. Okumala enaku, nali mu kukungubaga, n’asiiba era naasaba mu maiso ga Katonda ow’omuigulu. Male naakoba nti, “Ai Mukama, Katonda w’eigulu, ayinza byona byona era ow’ekitalo, oyo akuuma endagaano ye ey’okugonza n’abo abamugonza nibakuuma ebiragiro bye, nsaba okutu kwo kuwulirize n’amaiso go gabone okusobola okuwulira okusaba omuwereza wo kwa saba mu maiso go emisana n’obwire nga asabira abawereza bo, abantu abaIsirayiri. Ndatula ebibi ife abaIsirirayiri, nga ninze kwendi n’enumba ya baaba wange byetukoze mu maiso go. Tukoze eby’obunanfuusi mu maiso go. Titugondeire biragiro byo, amateeka gewawa omuwereza wo Musa. Ai Mukama leka okutu kwo kube nga kuwuliriza okusaba kw’abawereza bo abasunukira okuwa eriina lyo ekitiibwa. Nsaba omuwereza wo leero omuwe obuwanguzi mu maiso g’omusaada ono.” Ninze eyagemanga ekikopo kya kyabazinga.

Mu mwaka ogw’amakumi abiri ogwa kyabazinga, Atazakisesi bwebaamuleetera omwenge, natoola omwenge naaguwa kyabazinga. Nali tiwulirangaku nnaku mu maiso ge, kale kyabazinga yaambuuza nti, Lwaki ekyeni kyo kiidula enaku nga ate t’olimulwaire? Kino tikindi wabula nnaku ya kumutima.” Naawulira okutya kungi, aye naakoba kyabazinga nti, “Kyabazinga awangaale emirembe n’emirembe! Lwaki ekyeni kyange tikiidula nnaku nga ekibuga bakaire bange mwebagalamiire kyasigala matongo, era nga n’emiryango gyakyo gyayokebwa omuliro?” Kyabazinga yaankoba nti, “Ki ky’oyenda” Awo naasaba Katonda ow’eigulu, nairamu kyabazinga nti, “Bwekibanga kisanusa kyabazinga era omuwereza wo bw’aba nga yabona okuganja mu maiso go, nsaba onsindike mu kibuga kya Yuda bakaire bange yebagalamiire nje nkizimbe.” Awo kyabazinga yaambuuza nti, “Olugendo lwo lunaaba lwa naku imeka, era oliira li?” Kyabazinga yakibona bulungi okundikiriza okuja, kale naatawo ekiseera. Era olw’okuba omukono gwa Katonda wange gwandiku, kyabazinga yaikiriza okusaba kwange.

Sanibalati ni Tobiya, bwebaakiwulira, baatabulwa tabulwa ino okubona nti waaliwo omuntu eyali yewaireyo okusitula embeera ya abaIsirayiri. Naja e Yerusalemi era oluvainuma olw’okubayo enaku isatu, naasimbula okuvayo mu bwire nga ndiku n’abasaada batono. Tinakoberaku muntu yena yena ekyo Katonda wange kye yata ku mutima gwange okukolera Yerusalemi. Obwire nga buzibye naaja okwetegereza ebisenge bya Yerusalemi, ebyali byamenebwa n’emiryango egyayokebwa omuliro. Male naabakoba nti, “Mubona ebizibu byetulimu, Yerusalemi kiri matongo n’emiryango gyakyo gyayokebwa omuliro. Muide tuzimbe ekisenge kya Yerusalemi, tukome okuba mu kuswaala.” Era naabakobera ni ku mukono gwa Katonda wange ogw’ekisa ogundiku, n’ebyo kyabazinga byeyankoba. Baairamu nti, “Tutandike okuzimba.” Kale baatandika omulimu guno omulungi. Aye Sanibalati ni Tobiya bwebaakiwulira, baatuduula era baatuvuma nga bakoba nti, “Mukolaki kino? Mulikudeemera kyabazinga?” Naabairamu nga nkoba nti, “Oyo Katonda ow’eigulu aidakutuwa obuwanguzi. Ife abawereza be katutandike okuzimba.”

Sanibalati bweyawulira nga tuzimba ekisenge, yaasunguwala. Yaaduula abayudaya ng’akoba nti, Bano abayudaya abanafu bakola ki? Bayinza okuizawo ekisenge? Bayinza okumala mu lunaku olulala?” Tobiya yaakoba nti, Ekyo kyebazimba waire kibe nga kikiwalampye, kisobola okumena ekisenge kyaibwe eky’amabaale!” Ai Katonda waife, tuwulire, kubanga tunoomebwa. Bairize obunoomi bwaibwe bube ku mitwe gyaibwe. Baweyo nga omunyago mu nsi ey’obubudamo. Kale twazimba ekisenge okutuusa kyona kyona bwe kyatuuka wagati w’obuwanvu bwakyo, kubanga abantu baakola n’emitima gyaibwe gyona gyona. Aye Sanibalati, Tobiya, abawalabu, ab’amoni n’abasaada abe Asidoodi bwebaakiwulira nti okulongoosa kw’ekisenge kya Yerusalemi kujiire mu maiso, nti era n’ebituli byali bizibibwa, baasunguwala ino. Boona boona b’ekoobaana okuja okulwanisa Yerusalemi. Aye twasaba Katonda waifwe era twatawo omukuumi emisana n’obwire okwanganga ekizibu kino. Abalabe baife baakoba nti “Nga bakaali kutubona, tunaaba tuli wagati mubo era tunaabaita twakomya omulimu guno.” Olwo abayudaya abalinga okumpi nabo baida baatukobera emirundi nga ikumi nga bakoba nti, “Yemunaaja yona yona baidakutulumba.”

Nolwekyo naatawo abamu ku bantu einuma w’ekisenge we kyali nga kikaali wansi nga wasamye, nga balina ebitala, amafumu n’obusaale. Bwenamala okukebera ebintu, nayemerera naakoba abakungu, n’abafuzi n’abantu abandi boona boona nti, “Timubatya. Muidukire Mukama oyo owamaani ayinza byona, mulwanirire baganda baimwe, abaana baimwe ni bakazi baimwe n’amaka gaimwe.” Abalabe baife bwebategeera nga tuguire mu lukwe lwaibwe, twena twena twaira ku kisenge. Okuva ku lunaku olwo, kimu kya kubiri ku basaada bange n’abaakolanga omulimu ate nga ekitundu ekindi b’ebagaire amafumu, engabo, obusaale n’ebizibawo eby’ekyuma. Olwo naakoba abakungu, abafuzi n’abantu boona boona nti, “Omulimu munene n’ekifo kinene, ate tuli mataaga ino ku kisenge. Wemunaawulira eidobozi ly’ekondeere wona wona muide wano mutwegaiteku. Katonda waife aidakutulwanira! Kale twaja mu maiso n’omulimu nga kimu kya kubiri eky’abantu bagemye amafumu okuva ku kitangaala ekisooka nga busasaana okutuuka ku kazimyezimye nga munienie divayo.

Lulala naja mu numba ya Shemiya gwebaasibira mu numba ye. Yaankoba nti, “Leka tuje tubonaganire mu yekalu era leka tusibe n’emiryango gya yekalu kubanga waliwo abantu abalikuida okukuita leero obwire.” Aye naakoba nti, “Omusaada ali nga nze ayinza okulumuka? Oba oyo ali nga nze n’asaanira okuja mu yekalu okuwonia obulamu bwe? Tiidakuja!” Naakizuula nga Katonda yali tamutumye aye yali anangiriraku obunabbi obubi kubanga Tobiya ni Sanilabati baali bamuguze. Baali bamuguze okunkanga ndyoke ngwe mu kibi nga nkola ekyo olwo banteku eriina eibi okunkyayisa. Ai Katonda wange, idukiranga Tobiya ni Sanibalati olw’ebyo byebakoze. Kale ekisenge baakimalira mu naku atanu naibiri. Abalabe baife boona boona bwebakiwulira, amawanga okutwetoloola gaatya gaawamu amaani, kubanga gaategeera nti omulimu guno gwakolebwa n’obuyambi bwa Katonda waife.