Eiterekero:Luusi - Ambassador Institute Bible Story Curriculum

From Door43

Luusi

Luusi 1-4

Mu biseera eby’abalamuzi webaafugira, waaliwo endala mu nsi, era omusaada okuva e beserekemu eky’e Buyudaaya, walala ni mukyaala we ni batabani babiri, yaja okuba mu nsi y’e Mowabu okumala akaseera. Eriina ly’omusaada lyali Elimeleki, erya mukyaala we lyali Nawume, ate amaina ga batabani be ababiri gaali Makaloni ni Kiliyoni. Awo elimeleki iba Nawomi yaafa, yaamulekera batabani be ababiri. Baawasa abakazi aba Mowabu, omulala nga ayetebwa Olipa n’owundi nga ni Luusi. Oluvainuma lw’okubayo emyaka nga ikumi, Makaloni ni Kiliyoni boona baafa, era Nawume yaasigala nga iba azirawo ni batabani ababiri nga bazirawo. Bweyawulira nga ali e Mowabu nti Mukama yairuukirira abantu be nga abawa emere, Nawume ni ba namuwala be baatekateka okwirayo eka okuva yebaali. Nga ali ni ba namuwala be ababiri yava mu kifo we yali aba yaagema oluguudo oluja e Buyudaya.

Awo Nawume yaakoba ba namuwala be ababiri nti, “Mwireyo buli omu mu maka ga mukaire we. Nsaba Mukama abalage ekisa nga bwemwakiraga abafu baimwe era nga bwe mwakindaga.” Olipa yaairayo aye Luusi yairamu nti, “Lema kunkoba kukuvaaku oba okukyuka nkuviire. Y’oja yenaaja, era w’onaaba wenaaba. Abantu bo banaaba abantu bange ni Katonda wo anaaba Katonda wange.” Nawume bweyakizuula nga Luusi yali mumalirivu okuja naye, yalekera awo okumukoba okwirayo. Kale Nawume yaaira okuva e Mowabu nga ali ni Luusi omukazi omu Mowabu, namuwala we, yaatuuka e Beserekemu nga amakungula g’engaano gakatandika.

Luusi yaakoba Nawume nti, “Kanje mu nimiro nonde londe engaano esigaliire einuma w’oyo anansaasira.” Nawume yaamukoba nti, “Ja okole otyo muwala wange.” Kale yaaja munimiro yaatandika okulonda londa abakunguzi webamaze. Yeyagaana nga ali mu nimiro ya Bowazi eyali ow’omukika kya Elimeleki. Awo Bowazi yaatuuka okuva e Beserekemu yaalamusa abakunguzi nti, “Mukama abe ni imwe!” Baamwiramu nti, “Mukama akuwe omukisa.” Bowazi yaabuuza nampala wa abakunguzi be nti, “Omuwala oyo w’ani?” Nampala yaamukoba nti “N’omukazi omu Mowabu eyaira ni Nawume. Yansabye nti, ‘Ndikiriza nkungaanie obugwire wagati mu binwa abakunguzi webamaze.’ Yatandise okukola mu nimiro okuva ku nkyo okutuusa buti nga tayemereire, okutoolaku bw’awumwireku mu kigangu.” Kale Bowazi yaakoba Luusi nti, “Mpuliriza muwala wange, toja mu nimiro yindi kulonda londa ngaano, sigala wano n’abawala abankolera. Nkobye abasaada obutakugemaku. Era buli lwonaawulira enduwo, ja onwe amaadi agali mu nsuwa abasaada gebasenie.” Ku kino, Luusi yaavunama yaata obweni ku itaka. Yaakoba nti, “Lwaki nfunie okuganja mu maiso go nze omugwira?” Boaz yaairamu nti, “Bankobeire by’okoleire nazaala wo bukya balo afa, nga bwewalekawo baaba wo ni maama wo n’ensi yo, n’oida okuba mu bantu be wali toidi. Nsaba Mukama akusasule olw’ebyo by’okoze. Nsaba Mukama akusasule kigaiga, Katonda wa Isirairi, y’oidye okubudama wansi w’ebiwawa bye.”

Luusi bweyaira eka, yanumizaku nazaala we ku oyo mwene kifo mweyali alonda londa. Yaakoba nti, “Eriina ly’omusaada gwenkoleire leero ni Bowazi.” “Mukama amuwe omukisa!” Nawume yaakoba namuwala we nti, “Takomye okulaga ekisa kye eri abalamu n’eri abafu. Omusaada oyo waluganda waife wa kumpi; ali omu ku baiza-nganda mu kika kyaife.” Awo Luusi yaakoba nti, “Era yankobye nti, ‘Ba wano n’abakozi bange okutuusa bwebanaamala okukungula engano yange yona yona.’” Nawume yaakoba namuwala we nti, “Kinaaba kirungi y’oli okuja n’abawala be, kubanga bayinza okukukosa mu nimiro y’owundi.” Kale Luusi yaaba walala n’abawala abakozi ba Bowazi okulonda londa engano okutuusa amakungula lwe gaawa. Era yaaba walala ni nazaala we.

Lulala Nawume yaakoba Luusi nti, “Muwala wange, tinaalikufunire amaka mw’onaalabirirwa obulungi? Bowazi tiwaluganda waife? Leero olw’eigulo ajakukonda engano ye ku lugali. Naaba wesiige obuwowo ovaale engoye do edisingayo obulungi. Omale oje webakondera aye tomweyolekera okutuusa nga amaze okulya n’okunwa. Bw’anaaja okugalamira wetegereze w’anaagalamira. Male oje obwikule ebigere bye ogalamire awo. Aidakukukobera eky’okukola.” Luusi yaakoba nti, “Ndakukola kyona kyona ky’onaankoba.” Kale yaaja webakondera yaakola byona byona nazaala we byeyamukoba okukola. Bowazi bweyamala okulya n’okunwa n’akyamuka, yaja yaagalamira kunkomerero y’entuumu y’engano. Luusi y’ebomba, yaaja eri Bowazi yaamubwikula ebigere yaagalamira awo. Wagati mu bwire waabawo ekyakanga Bowazi yaakyuka yaabona omukazi nga agalamiire wabigere bye. Yaamubuuza nti, “Niiwe ani?” Luusi yairamu nti, “Ninze omuwerezawo Luusi. Yanduluza ensonda y’ekikunta kyo ombwike kubanga oli muiza nganda.” Bowazi yairamu nti, “Mwana wange Mukama akuwe omukisa. Ekisa kino kisinga nikyewalaga yebuviire. T’ononiiza basaada bavubuka oba bagaiga oba baavu. Kale muwala wange mpegano t’otya. Ndakukukolera kyona kyona ky’onaasaba. Basaada banange boona boona mu kibuga baidi nti oli mukazi wa kitiibwa.”

Enkeera walwo, Bowazi yaalangirira mu maiso g’abataka n’abantu boona boona nti, “Leero mulu badulizi nti nguze ku Nawume ebintu bya Elimeleki, Kiliyoni ni Makaloni byona byona. Era ntwaire ni Luusi namwandu wa Makaloni, omukazi omu Mowabu okuba mukazi wange.” Olwo abataka n’abo boona boona abaali ku mulyango baakoba nti, “Tuli badulizi.” Kale Bowazi yaatwala Luusi yaafuuka mukazi we. Male yaaja eri Luusi, era Mukama yaamusobozesa okufuna enda, yaazaala mutabani. Abakazi baakoba Nawume nti, “Mukama atenderezebwe oyo leero atakulese kubulaku muiza nganda. Tusaba Mukama amwatiikirize mu Isirayiri yoona yoona!” Abakazi abaabang’eyo baakoba nti, “Nawume afunie mutabani.” Baamutuuma eriina Obedi. N’eyali baaba wa Yese baaba wa Kyabazinga Dawudi.