Eiterekero:Kaana - Ambassador Institute Bible Story Curriculum

From Door43

Kaana

1 Samwiri 1 - 2

Waaliwo omusaada nga ayetebwa Elukaana. Yalina abakazi babiri; omulala nga ni Kaana n’owundi nga ni Penina. Penina yali azaala aye Kaana yali mugumba. Mwaka ku mwaka omusaada ono yayambukanga okuva mukibuga ky’ewaibwe okusinza n’okuwayo sadaaka eri Mukama Ayinza byona e Siiro. Buli lunaku bwe lwatuukanga Elukaana okuwayo sadaaka, yawanga mukazi we Penina ni batabani be ni bawala be boona boona ebifi by’emamba. Aye Kaana yamuwanga ekigero kya mirundi ebiri kubanga yamugonzanga, nga ate Mukama yali yamusiba nabaana ye. Era kubanga Mukama yali amusibye nabaana ye, muwalikwa we yamusonsonianga okumuniiza. Kino kyaaja kityo mwaka ku mwaka. Buli Kaana lwe yayambukanga mu numba ya Mukama, muwalikwa we yamusonsonianga okutuusa bweyaliranga yaaloba n’okulya. Iba Elukaana yaamukobanga nti, “Kaana,ekikuliza ki? Lwaki t’olya? Lwaki oba muyongobevu? Tikusingira batabani ikumi?”

Lulala bwe baali bamaze okulya nga bali e Siiro, Kaana yaayemerera. Mpegaano Kabona Eli yali atyamye ku ntebe nga eri wa mulyango ogunjira mu yekalu ya Mukama. Mubulumi obw’omwoyo, Kaana yalira ino era yaasaba Mukama. Era yaakola ekirayiro, yaakoba nti, “Ai Mukama ayinza byona, singa olinga kubunaku bw’omuzaana wo n’ondidukira, n’oterabira muzaana wo aye n’omuwa mutabani, kale nze ndimuwa Mukama enaku d’obulamu bwe dona dona, era kereta terikozesebwa ku mutwe gwe.” Nga asaba Mukama, Eli yamwekaliriza omunwa. Kaana yali asaba mu mutima gwe, n’omunwa gwe nga gutambula aye nga t’avamu idoboozi. Eli yaalowooza nti yali atamiire, ky’ava amukoba nti, “Olikoma li okutamiira? Tolawo omwengwe gwo.” Kaana yairamu nti, “Tibwekiri mukama wange ndi mukazi ali mu bizibu ebingi. Tiva kunwa mwenge oba nguuli; mbaire nfulumya omwoyo gwange eri Mukama. Totwala muzaana wo okuba omukazi omunanfuusi; mbaire nsaba nga ndi mu bulumi n’enaku nga bingi.” Eli yaamukoba nti, “Ja mirembe, era nsaba Katonda wa Isirayiri akuwe ky’omusabye.” Kaana yaakoba nti, “Nsaba omuzaana wo abone okuganja mu maiso go.” Awo yaaja yaafuna eky’okulya, n’ekyeni kye kyakoma okulaga enaku.

Kunkyo ino olunaku olwairaku baasituka baasinza Mukama male bairayo ewabwe e Lama. Elukaana yaasula ni mukazi we, era Mukama yaaidukira Kaana. Kale oluvainuma lw’ekiseera Kaana yafuna enda yaazaala omulenzi. Yaamutuuma erina Samwiri, yaakoba nti, “Kubanga omwana namusaba Mukama.” Omwana bweyayosera, Kaana yamutwaala, nga akaali muto atyo, walala n’enume ey’emyaka esatu, ensaano n’omwenge nga guli mu ibuga ly’oluwu, yaamuleeta mu numba ya Mukama e Siiro. Bwe baamala okusala enume, baaleeta omwana eri Eli. Kaana yaakoba Eli nti, “Bwene bwene nga bw’oli omulamu, mukama wange, ninze omukazi eyali wano kumpi niiwe nga nsaba Mukama. Nasaba omwana ono, era Mukama yampa kyenamusaba. Kale mpegano mmuwaireyo eri Mukama. Obulamu bwe bwona bwona anaawebwayo eri Mukama.” Era yaasinziza awo Mukama.

Awo Kaana yaasaba yaakoba nti, “Omutima gwange gusanukira mu Mukama. Ezira mutukuvu nga Mukama; ezira wundi atali iwe; ezira lwazi luli nga Katonda. Abo abaali abaigufu b’etunda okufuna emere, aye abo abaali abayala tibakaawulira ndala. Oyo eyali omugumba yazaala abaana musanvu, aye oyo eyazaala batabani abangi ayongobera. Mukama awereza obugaiga n’obwavu; aisa ate yaasitula. Asitula abaavu okuva mu nfuufu era yaasitula abali mu bwetaavu okuva ku ntuumu y’eivu; abatyamya n’abalangira era abafuula okuba abasika ba namulondo ey’ekitiibwa. Mukama alilamula enkomerero d’ensi. Aliwa kyabazinga gweyalonda amaani era aligulumiza eyiga ly’omulonde we.”

Male Elukaana yairayo eka e Lama, aye omulenzi yaawerezanga Mukama nga ali wansi wa Eli kabona. Buli mwaka mama we yamukoleranga akagoye yaakamutwalira bweyajanga niiba okuwayo ekiwebwayo ekya buli mwaka. Eli yaawanga Elukaana ni mukazi we omukisa nga akoba nti, “Nsaba Mukama akuwe abaana mu mukazi ono okuira mu kifo ky’oyo gweyasaba Mukama ate n’amuwa Mukama.” Baamala bairayo eka. Era Mukama yaagemerwa Kaana ekisa; yaafuna enda yaazaala batabani basatu n’abawala babiri. Kukiseera n’ekirala, omulenzi Samwiri yakulira mu maiso ga Katonda. Era omulenzi Samwiri y’eyongera okukula mu mubiri n’okufuna okuganja eri Mukama n’eri abantu.