Eiterekero:Isaaya - Ambassador Institute Bible Story Curriculum

From Door43

Isaaya

Isaaya 6, 53

Mu mwaka kyabazinga Uziya mweyafiira, nabona Mukama nga atyame ku namulondo ye, nga ali waigulu era nga agulumizibwa, era ekuvaalo kye ekireebetera eima we, kyaiduza yekaalu. Waigulu we waaliyo ba Serfu nga buli omu alina ebiwawa mukaaga: Baakozesa ebiwawa bibiri okwebwika ku bweni, ebiwawa bibiri okwebwika ku bigere n’ebiwawa ebibiri okuguluka. Era nga bakowoolagana nti, ‘Mutukuvu, mutukuvu, mutukuvu oyo Mukama ayinza byona;ensi yoona yoona yaidula ekitiibwa kye. Olwa amaloboozi gaibwe, emyango n’ebisenge byakankana era yekaalu yaidula omwosi. Naalira nti, “Wowe nze, nfire! Kubanga ndi muntu ow’omunwa ogutali mulongoofu, era mba mu bantu ab’eminwa egitali mirongoofu, era amaiso gange gaboine kyabazinga, Mukama ayinza byoona.” Male omu kuba Serafu yaguluka nga aida yendi nga agemye eryanda eryaka mu ngalo, lye yatoola ku kyoto n’ewuma. Yaanta eryanda ku munwa gwange yaankoba nti, “Bona lino likoonie ku munwa gwo;omusango gwo gukutooleibwaku n’ekibi kyo kimaze okusasulirwa omutango.”

Male naawulira eidoboozi lya Mukama nga lyogera nti, “Nnaatuma ani? Era n’ani anaatujiirawo?” Era naayogera nti, “Nze ndiwo. Ntuma!” Yaankoba nti, “Ja okobe abantu bano nti, ‘Mube nga muwulira, aye nga timutegeera; mube nga mubona aye nga timukifuna.’ Fuula emitima gy’abantu bano okuba emikakanavu;ziba amatu gaibwe era ozibe amaiso gaibwe. Bwekitaba kityo bayinza okubona n’amaiso gaibwe, baawulira n’amatu gaibwe, baategeera n’emitima gyaibwe, baakyuka bawonezebwe.” Naamubuuza nti, “Mukama, okumala ibanga ki?” Yairamu nti, “Okutuusa ebibuga lwebirisigala amatongo nga muzira babirimu, okutuusa amayumba lwegalisigala nga merere n’nimiro nidiyonoonebwa, okutuusa Mukama lwalisindika buli abantu boona boona ewala n’ensi n’esigala nga bagyabuliire. Era waire kimu kya ikumi balisigala mu nsi, era erisigala nga matongo. Aye nga omuvule n’omukoko bwebirekawo ebikolo nga bagisaze, etyo ensigo entukuvu bweriba ekikolo mu nsi eyo.”

Yakulira mumaiso ge nga olulimi lwe kimera ekyakavayo, era nga omuzi ogufuluma mu itaka eikalu. Tiyalina bulungi oba ekitiibwa okutusikiriza okuja y’ali, tiwaali kintu mu mboneka ye ekyalituleteire okumwenda. Yanoomebwa era yaakyayibwa abantu, yali muntu wa nnaku era eyamanirira okubonaboona. Nga alinga oyo abantu gwe b’ekweka, yanoomebwa, era titwamuwa kitiibwa. Mazima yatwaala obunafu bwaife era yaatwaala ennaku yaife, kyoka twamutwaala okuba eya kubibwa Katonda, eyafuntulwa Katonda, n’akosebwa. Aye yafumitibwa lwa bibi byaife; ekibonerezo ekyatuleetera emirembe kyali ku ye, era olw’ebiwundu bye, tuwonezebwa.”

Twena twena, nga entaama twawaba, buli omu ku ife yaja mu njira ye; era Mukama yaamutaku ebyonono byaife twena twena. Yatulugunizibwa era yaakosebwa, kyoka tiyayasama munwa gwe;yatwaalibwa nga entaama ento eja okuitibwa, era nga entaama bw’esirika mu maiso g’abagimwa ebyoya, yena atyo bw’atayasama munwa gwe. Yatoolebwawo mu kunigirizibwa n’okusalirwa omusango. Era ani ayinza okwogera ku baidukulu be? Kubanga yakutulwa ku nsi eyabalamu; yakubibwa olw’ebibi bya abantu bange. Yaweebwa entaana eri awali ed’ababi, era yaateebwa walala n’abagaiga nga afiire waire tiyakolaku bukambwe, waire okuba n’obulimba mu munwa gwe.

Ate nga kwali kusiima kwa Mukama okumubetenta n’okumuleetera okubonaabona, era waire Mukama afuula obulamu bwe okuba ekiwebwayo eky’omusango, alibona eizaire lye era aliyongeza enaku de, era okusiima kwa Mukama kulyeyongera mu mukono gwe. Oluvainuma olw’okubonaabona okw’omwoyo gwe, alibona ekitangaala eky’obulamu era yaaigusibwa; olw’okumanya kwe omuwereza wange omutuukirivu alifuula bangi okuba abatuukirivu, era alitwaala obutali butuukirivu bwaibwe. Nolwekyo ndimuwa ekifo wagati mubaatikirivu, era aligabana omunyago n’ab’amaani, kubanga yawayo obulamu bwe eri okufa, era yaabalibwa walala n’abonooni. Kubanga yatwaala ekibi eky’abangi, era yaawolereza abonooni.