Eiterekero:Gidiyoni - Ambassador Institute Bible Story Curriculum

From Door43

Gidiyoni

Abalamuzi 6-7

Ate aba Isirayiri baayonoona mu maiso ga Katonda, era okumala myaka musanvu, yabawayo mu mikono gy’aba Midiyani. Kubanga obufuzi bwa aba Midiyani bwali bunigiriza ino, aba Isirayiri b’ekolera ebisulo mu biwonvu eby’omunsozi, mu mpuku ni mu nfo. Aba Midiyani baasisira mu nsi, baayonoona emere, baalema kulekerawo Isirayiri kiramu kyona kyona, oba ntaama, nte waire ndogoyi. Aba Midiyani fotolera irala aba Isirayiri baatuuka n’okulirira Mukama okubayamba.

Malaika wa Mukama yaabonekera Gidioni yaamukoba nti, “Mukama ali ni iwe, omulwani omuzira.” Gidioni yaamuiramu nti, “Aye sebo, Mukama bw’aba nga ali n’ife, lwaki bino byona byona bitutuuseku? Ebyamagero bye biriwa ebyo ba baaba baife bye baatukoberanga bwe baakobanga nti, ‘Mukama tin’eyatutoola e Misiri?’ Aye mpegano Mukama yatwabulira yaatuleka mu mikono gya aba Midiyani.” Mukama yaamukyukira yaamukoba nti, “Jiira mu maani g’olina, onunule Isirayiri okuva mu mikono gya aba Midiyani. Tirikukutuma? Gidiyoni yaabuuza Mukama nti, “Aye Mukama ninza ntya okununula Isirayiri, ekika kyange n’ekisembayo mu maani mu Manase, ate ninze asembayo mu maka g’ewaife.” Mukama yaamuiramu nti, “Ndakuba niiwe era oida kuita aba Midiyani boona boona walala.” Gidiyoni bweyategeera nti oyo yali Malaika wa Mukama, yakoba nti, “Eh! Mboine Malaika wa Mukama maiso ku maiso.” Aye Muakama yaamukoba nti, “Mirembe! Totya tojakufa.” Nolwekyo, awo Gidiyoni yaazimbirawo Mukama ekyoto yaakyeta Mukama mirembe.

Obwire bwene obwo, Mukama yaakoba Gidiyoni nti, “Menawo ekyoto baaba wo kyeyakolera Baali era otemewo empango eya Asera eri ku mbali wakyo. Male ozimbirewo Mukama Katonda wo ekyoto ekirungi ku ntwiko ya wano. Ng’okozesa enku okuva mu muti ogwa Asera gw’otemye wayo enume ey’okubiri nga ekiwebwayo ekyokebwa.” Kale Gidiyoni yaatwaala ikumi ku baweereza be yaakola nga Mukama bweyamukoba. Aye kubanga yatya ab’omumaka g’ewaibwe n’abasaada ab’omukibuga, yakikola bwire so ti misana. Kunkyo abasaada b’ekibuga bwebaazuuka, baabona nga ekyoto kya Baali baali bakimeniewo n’empango ya Asera nga bagitemyewo n’enume ey’okubiri nga bagisadaase ku kyoto ekiyaaka! Baabuuzagania nti, “Ani akoze kino?” Bwebaabuuliriza obulungi, baabakoba nti, “Gidiyoni mutabani wa Yowasi n’eyakikoze.” Abasaada b’ekibuga baakoba Yowasi nti, “Leeta mutabani wo. Atekwa okufa, kubanga yameniewo ekyoto kya Baali ate yaatemawo empango ya Asera eyali kumbali.” Aye Yowasi yaakoba abantu abaali bamwetoloire nga bataamye nti, “Nimwe abanaawolezawo Baali ensonga de? Mugezaku okumuwonia? Baali bwaba nga bwene katonda, asobola okwetaasa singa omuntu amena ekyoto kye.” Kale ku lunaku olwo Gidiyoni baamweta “Yeruba Baali” baakoba nti, “Leka Baali amwekolereku,” kubanga yamena ekyoto kya Baali. Awo Omwoyo wa Mukama yaika ku Gidiyoni, yaafuuwa e kondeere, yaayeta abantu okumugoberera.

Mukama yaakoba Gidiyoni nti, “Ondeteire abasaada bangi okugabula Midiyani mu mikono gyaibwe. Isirayiri obutaneragiraku nti amaani ge n’agamuwanguza, mpegano langirira eri abantu nti, ‘Omuntu yenayena adugumira olw’okutya asobola okwirayo ave ku lusozi giridi.’” Kale absaada emitwaalo ebiri n’enkumi ibiri baairayo, ate waasigalawo abasaada omutwalo mulala. Aye Mukama yaakoba Gidiyoni nti, “Wakaaliwo abasaada bangi. Batwaale emanga ku maadi, era ndakubakulonderamu eyo.”

Kale Gidiyoni yaatwaala abasaada emanga ku maadi. Eyo, Katonda yaamukoba nti, “Yawula abo abakomba amaadi okunwa nga embwa ku abo abafukamira okunwa.” Abasaada bikumi bisatu baasena baasena amaadi mu lubatu baanwa. Abaasigala boona boona baafukamira baanwa. Mukama yaakoba Gidiyoni nti, “Nga nkozesa abasaada ebikumi ebisatu abasenie amaadi mu lubatu, naakulokola era nkuwe aba Midiyani mu mikono gyo. Leka abasaada bale abandi baireyo buli omu ewuwe.” Kale Gidiyoni yasiibula aba Isirayiri bale abandi baaja mu wema daibwe aye yaasigaza ebikumi ebisatu, abaatwaala eby’okukozesa n’ekondeere eda bale.

Mpegano enkambi ya aba Midiyani yamuli wansi mu kiwonvu. Yagabamu abasaada mu bikunsu bisatu, yaabawa ekondeere n’ebidoome ebyereere nga birimu emimuli. Yaabakoba nti, “Muningirire, mungoberere. Bwenaatuuka ku ndegoyego d’enkambi, mukole nga bwenaaba nkola. Nze ni bendi nabo bwetunaafuuwa ekondeere daife, olwo mwena nga mwetoloire enkambi mufuuwe edaimwe nga muleekaana nti, ‘Ku lwa Mukama ni ku lwa Gidiyoni’” Gidiyoni n’abasaada beyalina baatuuka ku ndegoyego d’enkambi ku ntandikwa ya saawa eya wagati, nga baakamala okukyusa abakuumi. Baafuuwa ekondeere baamena n’ebidoome byebaali bagemye. Ebikunsu byonsatule byafuuwa ekondeere byamena n’ebidoome. Nga bagemye emimuli mu mikono gyaibwe emigooda, n’ekondeere mu mikono gyaibwe egya dyo, baaleekaana nti, “Ekitala kya Mukama ni Gidiyoni!” Nga buli muntu agumiire mu kifo kye okwetoloola enkambi, aba Midiyani boona boona baalumuka bwe balira. Ekondeere ebikumi ebisatu bwe da vuga, Mukama yaleetera abasaada abaali mu nkambi yona yona okwefuuliragana baatemagana. Eije lya lumuka era baayeta aba Isirayiri okubagoba era ku lunaku olwo aba Isirayiri baawangula aba Midiyani.