Eiterekero:Enyana ya Zaabu - Ambassador Institute Bible Story Curriculum

From Door43

Enyana ya Zaabu

Okuva 32

Mukama yaakoba Musa nti, “Yambuka yendi ku lusozi obe wano nkuwe ebipande eby’amabaale,bye nawandiikaku amateeka n’ebiragiro okubasomesa.” Musa bwe yayambuka ku lusozi, ekire kya lubuutikira N’ekitiibwa kya Mukama kyaika ku lusozi Sinai. Eri aba Isirayiri, ekitiibwa kya Mukama kyabafananira nga omuliro ogw’amaani oguli ku ngulu ku lusozi. Awo Musa yangira mu kire nga ayambuka olusozi. era yaaba ku lusozi enaku ana omusana n’obwire.

Abantu bwebaabona nga Musa aluire okuika okuva ku lusozi, baakungaana b’etoloola Aloni baamukoba nti, “Ida otukolere bakatonda abanaatukulembera. Ono omusaada Musa eyatuleeta okuva e Misiri tituidi kyamutuukaku. Aloni yaabakoba nti mutoole ku bakyaala baimwe, ku batabani baimwe ni ku bawala baimwe ebikomo bya zaabu bye bavaire, mubindeetere. Kale abantu boona boona baatoolaku ebikomo byaibwe baabileetera Aloni. Yaakozesa byebaamuwa okukola ekibumbe ekifaanana enyana nga akozesa ebiweesa. Olwo baakoba nti, “Bano ni bakatonda bo ai Isirayiri abaakutoola e Misiri.” Aloni bwe yabona ebyo, yaazimba ekyoto mu maiso g’enyana era yaalangirira nti, “Enkyo, wajakubaawo okujaguliza Mukama.” Kale enkeera walwo, abantu baawuuna baawaayo ebiweebwayo ebyokye baawayo n’ebiweebwayo eby’okuisa ekirala. Oluvainuma baatyama okulya n’okunwa male baasituka okwetaba mu binumo.

Awo Mukama yaakoba Musa nti, “Ika wansi kubanga abantu bo be waleeta okuva e Misiri bonoonese. Baangwiwe okuva ku bye nabalagira, b’ekolera ekibumbe ekifaanana enyana. Bakivunamiire baakikolera ebiwebwayo, baakoba nti, ‘Bano ni bakatonda bo ai Isirayiri, abaakutoola e Misiri.’” Mukama yaakoba Musa nti, “Mboine abantu bano, era bantu ba nkoto nkakanavu. Mpegano ndeka obusungu bwange bubabuubuukireku era mbasaaniewo, male nkufuule eiwanga eitutumufu.”

Aye Musa yasaba Mukama Katonda we ekisa. Yaamukoba nti, “Ai Mukama, lwaki obusungu bwo bwali buubuukiire ku bantu bo, abo bewatoola e Misiri mu maani amangi n’omukono ogw’amaani? Lwaki aba Misiri bandikobye nti, ‘Yalina kigendererwa kya bunanfuusi okubatoolayo aje abaitire munsozi abasaaniewo okuva ku bweni bw’ensi’? Kyuka oleke obusungu bwo obwentiisa; ikaikana oleme kuleeta kikoligo ku bantu bo beene. Idukira abaweereza bo Ibulayimu, Isaka ni Isirayiri, abo bewerayirira iwe mwene: ‘Ng’okoba nti ndiyaza abaidukulu bo okuba nga munienie eda waigulu era ndiwa abaidukulu bo ensi eno yona yona yenabasuubiza era eriba obusika bwaibwe emirembe n’emirembe.’” Olwo Mukama yaaikaikana yaalema kuleeta kikoligo ku bantu be kyeyali atisiiza okukola.

Musa yaakyuuka yaaikirira olusozi nga alina epipande ebibiri eby’obudulizi mungalo de. Byali biwandikiibwaku emberi n’einuma. Ebipande bino byali mulimu gwa Katonda; obuwandiike gwaali mukono gwa Katonda ogwakokotebwa ku bipande bino. Musa bweyasemberera enkambi, naabona enyana, n’okukina okwali kuja mu maiso, obusungu bwe bwabuubuuka, era yaasuula ebipande okuva mu ngalo de, byamenekera ku ntobo y’olusozi. Yaatoola enyana yebaali bakoze, yaagyokya mu muliro; male yaagisa yaafuuka buwunga, yaagimansa ku maadi yaalagira aba Isirayiri okuganwa. Yaakoba Aloni nti, “Abantu bano baakukolaki, n’obakulembera okuja mu kibi ekinene kityo?”

Aloni yaamuiramu nti “T’osunguwala mukama wange, oidi nti abantu bano bawangulwa mangu ekibi. Bankoba nti ‘Tukolere bakatonda abanaatukulembera. Ono omwami Musa eyatutoola e Misiri, tituidi kyamutuukaku.’ Kale nabakoba nti ‘Buli alina kikomo kya zaabu akitooleku.’ Kale bampa zaabu, naagisuula mu muliro, era yaavamu nga enyana.” Musa yaabona nti abantu baali bataamye era nga Aloni yabaleka okubbaamuuka baafuuka ekisekererwa mu maiso ga abalabe baibwe Kale yaayemerera ku mulyango gw’enkambi yaakoba nti “Buli ali kulwa Mukama aide yendi.” Era aba Levi boona boona baamweyungaku. Awo yaabakoba nti , Kino Mukama ky’akoba Katonda wa Isirayiri. ‘Buli musaada y’esibe ekiso mumbali, Muje emberi n’einuma mu nkambi nga mugibitamu okuva ku nkomerero okutuuka ku nkomerero nga buli muntu aita muganda we, mukwano gwe ni mulinanwa we.’” Aba Levi baakola nga Musa bweyalagira, era ku lunaku olwo, abantu enkumi isatu, baafa.

Olunaku lwairaku, Musa yakoba abantu nti, “Mukoze ekibi kinene ino. Aye kanambuke waigulu eri Mukama; obolyawo ninza okwegayirira olw’ekibi kyaimwe.” Kale Musa yairayo eri Mukama yaakoba nti, “Wowe, abantu bano nga bakoze ekibi kinene ino! B’ekoleire bakatonda aba zaabu. Aye mpegano nkusaba osoniwe ekibi kyaibwe. Aye oba tin’ekyo, nsangula mu kitabo kye wa wandiika. Katonda yaayanukula Musa nti, Buli eyayonoona mu maiso gange njakumusangula mu kitabo kyange. Wabula,ekiseera bwekirituuka nze okubonereza, ndi ba bonereza olw’ebibi byaibwe.” Era Mukama yaasindikira abantu ekikoligo olw’ekyo kye baakola n’enyana Aloni yeyabakolera.