Eiterekero:Dawudi Awonia Obulamu bwa Sawulo - Ambassador Institute Bible Story Curriculum

From Door43

Dawudi Awonia Obulamu bwa Sawulo

1 Samwiri 23-24

Dawudi yaabanga mu nfo ni mu nsozi eby’omuidungu. Lunaku ku lunaku Sawulo yaamunonianga, aye Katonda tiyawaayo Dawudi mu mikono gya Sawulo. Dawudi bweyali e Koleesi, yaakitwgeera nti Sawulo yali aidye okumuita. Mutabani wa Sawulo, Yonasani yaaja eri Dawudi e Koleesi yaamuyamba okufuna amaani mu Katonda. Yaamukoba nti, “Totya, baaba wange Sawulo t’ayinze kukutaaku mukono. Oidakuba kyabazinga wa Isirayiri, era nze ndiba wa kubiri ku iwe. Ni baaba wange Sawulo kino akiidi.” Bombi baakola enagaano mu maiso ga Katonda. Awo Yonasaani yairayo eka, aye Dawudi yaasigala e Koleesi.

Sawulo n’abasaada be baatandika okunoonia Dawudi, era Dawudi bwebaakimukobera, yaaserengeta ku lwazi yaaba mu idungu ery’e Mawuni. Sawulo bweyakiwulira, yaaja mu idungu ery’e Mawuni okuyiiga Dawudi. Sawulo yali abita ku luuyi olulala olw’olusozi ni Dawudi nga ali ku lundi n’abasaada be, nga bayanguwa okuviira Sawulo. Nga Sawulo n’eigye lye basembereire Dawudi n’abasaada be okubagema, Omubaka yaida eri Sawulo yaamukoba nti, “Ida mangu! Abafirisuti balumbye ensi.” Olwo Sawulo yaakoma okulondoola Dawudi yaaja okusisinkana abafirisuti. Era Dawudi yaavayo eyo yaaja okuba mu nfo ed’e Eni Gedi.

Sawulo bweyaira okuva okugoba aba Firisuti, baamukoba nti, “Dawudi ali mu idungu ery’En Gedi.” Kale Sawulo yaalonda abasaada enkumi isatu okuva mu Isirayiri yona yona yaaja nabo okunoonia Dawudi n’abasaada be. Yaatuuka awaali ebiraalo eby’entaama ku luguudo;waaliwo empuku, Sawulo yagiinjiramu okweteewuluza. Dawudi n’abasaada be baali wala einuma mu mpuku. Abasaada ba Dawudi baamukoba nti, “Luno n’olunaku Mukama lweyayogeraku bweyakukoba nti, ‘Ndikuwa omulabe wo mu mukono gwo omukole nga bw’oliba osiimye.’” Awo Dawudi y’emulula nga taboneka yaasala ensonda ku kivaalo kya Sawulo. Oluvainuma Dawudi yaakoba absaada be nti, “Mukama ansaasire nze okukola ekintu ng’ekyo ku mukama wange, omufukewaku amafuta owa Mukama, oba okusitula omukono gwange ku ye;kubanga ye mufukewaku amafuta owa Mukama.” N’ebigambo bino, Dawudi yawakania abasaada be era tiyabaikiriza okulumba Sawulo. Era Sawulo yaafuluma mu mpuku yaaja.

Male Dawudi yaafuluma mu mpuku yaakowoola Sawulo nti, “Mukama wange kyabazinga!” Sawulo bweyalinga einuma we, Dawudi yaavunama n’obweni ku itaka. Yaakoba Sawulo nti, “Lwaki owuliriza abantu abakoba nti, ‘Dawudi yefunirire okukukola akabi?’ Olwaleero luno obweine n’amaiso go nga Mukama bw’akuwaireyo mu mikono gyange mu mpuku. Waliwo abankobye nkuite aye mponiiza obulamu bwo;nkobye nti, ‘Tigalule mukono gwange kuguta ku mukama wange kubanga mufukewaku amafuta owa Mukama.’ Bona baaba wange, linga ku kikutu ky’olugoye lwo ekiri mu ngalo dange! Nsaze ensonda ey’ekivaalo kyo aye tikuise. Mpegano kitegeere era kibone nti nzira nsobi yenakola oba okuba n’omusango ogw’obudeemu. Tikukolanga bubi aye ondiiga okutwaala obulamu bwange. Nsaba Mukama atulamule iwe ninze. Era nsaba Mukama akusasule ebibi by’onkoze aye omukono gwange tigulikugemaku. Kyabazinga wa Isirayiri afulumye kulumba ani? Ogoba ani? Mbwa nfu? Nkukuni? Nsaba Mukama abe omulamuzi waife asalewo wagati waife. Nsaba alowooze ku nsonga yange era aginweze;nsaba ankakase obutaba na musango nga andokola okuva mu mukono gwo.”

Dawudi bweyamala okwogera ebigambo bino, Sawulo yaamubuuza nti, “Eryo doboozi lyo, mutabani Dawudi? Yaakuba empungu. Onsinga obutuukirivu,” yaakoba nti, “Ombisiiza bulungi, aye nze nkubisiiza bubi. Ovakunkobera buti obulungi bw’onkoleire;Mukama ampaireyo mu mikono gyo aye t’ondise. Omuntu bw’azuula omulabe we, ayinza okumuleka yaaja nga t’amukosiiza? Nsaba Mukama akusasule bulungi olw’engeri y’ombisiizamu leero. Ndidi nti bwene oliba kyabazinga era nti n’obwakyabazinga bwa Isirairi buliteebwa mu ngalo do. Mpegano ndayirira mu liina lya Mukama nti tolisalaku baidukulu bange oba okusaaniawo eriina lyange okuva mu kika kya baaba wange.” Kale Dawudi yaawa Sawulo ekirayiro kye. Male Sawulo yairayo eka, aye Dawudi n’abasaada be bairayo mu nfo.