Eiterekero:Danieri n’empologoma - Ambassador Institute Bible Story Curriculum

From Door43

Danieri n’empologoma

Danieri 6

Daliyo yasiima okulonda abafuzi ab’amasaza okugafuga wona wona mu bwa kyabazinga, nga batwalibwa abakungu basatu nga omu ku bo yali Danieri. Mpegano Danieri yaalaga obukugu okusinga bakungu baine n’abamasaza boona boona olw’ebirabo bye ebyali eby’ekika ekyawaigulu era kyabazinga yakilowooza okumuta mu kifo okutwala obwakyabazinga bwona bwona. Ab’amasaza n’abakungu abandi bwebaakibona baafuba okuzuula webanaatandiikira okumusibaku omusango mu ngeri yeyakolangamu emirimu gy’obwakyabazinga, aye baalemwa. Tibaayinza kumuzuulamu kulya nguzi kubanga yali muntu mwesigwa era nga t’alya nguzi oba okuba omubambaavu. Kunkomerero absaada bano baakoba nti, “Tituliyinza kuzuula nsonga ya kuta musango ku musaada ono Danieri okutoolaku nga kyekuusa ku mateeka ga Katonda we.”

Kale abakungu n’abamasaza baajiira walala baakoba kyabazinga nti, “Ai kyabazinga Daliyo, wangaala emirembe n’emirembe! Abakungu mu bwakyabazinga, abalamuzi, ab’amasaza, abawabuzi n’ab’afuzi twena twena tikiriiza nti kyabazinga agwaana okubisa ekiragiro era libe iteeka nti omuntu yena yena asinza katonda yena yena oba omuntu mu naku asatu agairirira, atali iwe, Ai kyabazinga, anaasuulibwa mu mpuku ey’empologoma. Mpegano, Ai kyabazinga, bisa ekiragiro ekyo era kiwandiikibwe kireme kuba nti kikyusubwa.” Kale kyabazinga Daliyo yaata ekiragiro mu buwandiike.

Mpegano Danieri bweyategeera nga ekiragiro kimaze okuteebwa mu buwandiike, yairayo eka mu kisenge eky’okumwaliiro ogwa waigulu okwali amadirisa agalingiriire Yerusaalemi. Emirundi esatu buli lunaku yafukamiranga yaasaba, nga awayo okwebaza eri Katonda, okufaanana nga bweyali akikola einuma. Awo abasaada bano baaja nga ekikunsu baayagaana Danieri nga asinza Katonda era nga amusaba obuyambi. Kale baaja eri kyabazinga baayogera naye ebigema ku kiragiro kye nga bakoba nti, “Tiwawandiisa kiragiro nti mu naku asatu ediida omuntu yena yena alisinza katonda yena yena oba omuntu atali iwe, Ai kyabazinga, alisuulibwa mu mpuku ey’empologoma?” Kyabazinga yaairamu nti, “Ekiragiro kikaaliwo.” Male baakoba kyabazinga nti, “Danieri omu kubabudami abaava e buyudaaya, takuwuliriza Ai kyabazinga, oba okuwuliriza ekiragiro kyewata mubuwandiike. Akaasaba emirundi esatu olunaku.” Kyabazinga bweyakiwulira, yatabulwa ino; yali mumalirivu okutaasa Danieri era yaafuba okutuusa ku kazimyezimye amutaase. Male abasaada baaja nga ekikunsu eri kyabazinga baamukoba nti, “Ai kyabazinga, idukira, nti wazira kiragiro oba iteeka kyabazinga ly’ateeka eriyinza okukyusibwa.”

Kale kyabazinga yaalagira, baaleeta Danieriyaasuulibwa mu kiina eky’empologoma. Kyabazinga yaakoba Danieri nti, “Nsaba Katonda wo oyo gw’owereza olubeerera, akununule!” Ogubaale gwaateebwa ku mulyango gw’empuku, era kyabazinga yaaguisaaku laama ye n’eyabakungu be embeera ya Danieri ereme kukyuusibwa. Male kyabazinga yairayo mu lubiri lwe yaasula nga taliire era nga tiwabaire nakimukolerwa okumusanusa. Era tiyabona ku ndoolo. Nga busasaana kunkyo, kyabazinga yayanguwa yaaja ku mpuku y’empologoma. Bweyatuuka ku mpuku y’empologoma, yakowoola Danieri mu idoboozi ery’enaku nti, “Danieri omuwereza wa Katonda omulamu, Katonda wo oyo gw’owereza oluberera, yasoboire okukuwonia empologoma?” Danieri yamwanukula nti, “Ai kyabazinga, wangaala emirembe n’emirembe! Katonda wange yawereiza malaika we, yaaziba eminwa gy’empologoma. Tidankoze kabi kubanga kyazuuliibwa nti tinalina musango mu maiso ge. Ate nga era tisobyangaku mu maiso go, Ai kyabazinga. Kyabazinga yabuutikirwa eisanu yaalagira basituleyo Danieri okuva mu mpuku y’emplogoma. Era Danieri bweyatoolebwayo mu mpuku y’empologoma, tiyaliku kiwundu kyona kyona, kubanga y’esiga Katonda we. Ku biragiro bya kyabazinga, abasaada abaloopa Danieri mu bukuusa, baaleetebwa baasuulibwa mu mpuku y’empologoma walala ni bakyaala baibwe n’abaana baibwe. Era nga bakaali kutuuka ntobo ya mpuku, empologoma daabavunia daabamenamena amagumba

Awo kyabazinga Daliyo yaawaandiikira abantu boona boona, amawanga n’abantu aba buli lulimi wona wona mu nsi nti “Mufune omukisa mu bungi! Mbisa eiteeka nti mu bitundu byona byona eby’obwakyabazinga bwange, abantu bateekwa okutya n’okuwa ekitiibwa Katonda wa Danieri. Kubanga ni Katonda omulamu era abawo emirembe gyona gyona. Obwakyabazinga bwe tibulizikirizibwa n’obufuzi bwe tibulikoma. Anunula era alokola. Akola obubonero n’ebyewunio mu igulu ni kunsi. Awiniiza Danieri amaani g’emologoma.” Kale Danieri yaakulakulana mu bufuzi bwa Daliyo.