Eiterekero:Abakeesi Eikumi n’ababiri Abaatumibwa e Kanani - Ambassador Institute Bible Story Curriculum

From Door43

Abakeesi Eikumi n’ababiri Abaatumibwa e Kanani

Okubala 13 -14

Mukama yakoba Musa nti "Tuma abamu ku basaada mu nsi ya Kanani ye nja okuwa aba Isirayiri, okugiziga. Mu buli kika londamu omukulembeze mulala, obatume.” Nolwekyo, Musa yabatuma nga Mukama bweyamulagira.

Musa bwe yabatuma okuziga Kanani, yabakoba nti, “Mwekalirize ensi bw’efaanana era n’abantu baayo oba baamaani oba banafu, oba bangi oba batono. Ensi mwebali yakula etya? Nungi oba mbi? Baba mu bibuga bifaanana bitya? Biriku ebisenge oba kuzira bisagaati? Eitaka lyakula litya? Igimu oba ibi? Eriyo emiti oba bbe. Mufube ino okubona nti muleetayo ku bibala byayo.” Kale baaja baaziga ensi eyo. Bwebaatuuka mu kiwonvu eky’Esikoli, baasala olusaga lw’omuti okwaali ekibututa kirala ekya zabbibu. Babiri kubo baakisitulira ku mwini wagati mubo, era baaleta n’obutunda n’amatiini. Oluvainuma lwe nnaku makumi ana, baira okuva mu kuziga ensi.

Baira eri Musa, ni Aloni n’eri aba Isirayiri boona boona baabategeeza baabalaga n’ebibala eby’ensi eyo. Baategeeza Musa bati, “Twaja munsi yewatutumamu era ekulukuta amata n’omubisi gw’enduki! Bino n’ebibala byayo. Aye abantu abayo b’amaani era ebibuga byaibwe biriku ebisagaati ebigumu ate binene ino.” Awo Kalebu yaasirisa abantu mu maiso ga Musa era yaakoba nti, “Tusaana tuje tutwaale ensi eyo kubanga bwene tusobola.” Aye abasaada abaaja naye baakoba nti, “Titusobola kulumba bantu abo, batusinga amaani.” Era baasasaania ebigambo ebibi mu ba Isirayiri ebifa ku nsi ye baaja okuziga. Baakoba nti, “Abantu be twaabona bantu bawagufu ino. Twebona nga amasisi era tutyo bwebaatubona.”

Obwire obwo abantu boona boona baasitula amaloboozi gaibwe baalira nga baleekaana. Aba Isirayiri boona boona b’emuluguniza Musa ni Aloni, baabakoba nti, “Wakiri singa twafiira e Misiri! Oba mu idungu! Lwaki Mukama atuleeta mu nsi eno okutuleka okuitibwa ekitala? Bakyaala baife n’abaana baife baidakutwaalibwa nga omunago. Tikyaalisinzeku ife okuirayo e Misiri?” Baakobagana nti, “Tusaana tulonde omukulembeze twireyo e Misiri.”

Awo Musa ni Aloni baagwa mu maiso g’aba Isirayiri boona boona nga bakunganie. Yoswa ni Kalebu abaali mu abo abaaja okuziga ensi baayuza ebivaalo byaibwe, baakoba olukungaana lwa aba Isirayiri boona boona nti, “Ensi yetwaja okubona yabitirira obulungi. Mukama bw’anaatusiima aidakugituwa. Mwekuume obutademera Mukama. Ate muleme kutya bantu ba nsi eyo, kubanga tuidakubamira. Obukuumi bwaibwe buweirewo, aye Mukama ali niife.” Aye olukungaana lwona lwona lwawera okubakuba amabaale. Mukama yaakoba Musa nti “Abantu bano balikoma wa okumbisamu amaiso? Balituusa wa obutandikiriza,waire nga mbakozemu ebyamagero ebyo byona byona? Njakubakuba ekikoligo mbasaaniewo, aye iwe njakukufuula eiwanga eryamaani era eryatiikirivu okubasinga.”

Musa yaakoba Mukama nti, “Olwo aba Misiri balikiwulira! Mu maani go watoolayo abantu bano okuva mu ba Misiri. Era balikikobera abantu b’omunsi eno. Baamala okuwulira nti iwe, ai Mukama olin’abantu bano, era nti iwe ai Mukama waboneka bweni ku bweni era nti obakulembera mu mulongooti ogw’ekire emisana n’omulongooti ogw’omuliro obwire. Singa oita abantu bano ku mulundi mulala, amawanga agaliwulira amawulire gano ku iwe galikoba nti, ‘Mukama yalemererwa okutuusa abantu bano mu nsi yeyalaira okubawa; nolwekyo yabasandagira mu idungu.’ Mpegano nsaba amaani ga Mukama gabonesebwe, nga bwewakilangirira: ‘Mukama alwa okusunguwala, alina okugonza kungi, asoniwa ebibi n’obudeemu. So nga ate taleka bonooni nga tibabonerezeibwa; abonereza abaana olw’ekibi kya ba baaba baibwe okutuuka ku mujiji ogw’okusatu n’ogw’okuna.’ Okutuukaana n’okugonza kwo okungi, soniwa ekibi kya abantu bano, okufaanana nga bw’obasoniiwe okuva lwe baava e Misiri okutuuka buti.”

Mukama yaamwanukula nti, “Mbasoniiwe nga bw’osabye. Wabula, bwene bwene nga bwendi omulamu era nga bwekiri nti ekitiibwa kya Mukama kibuna ensi yona yona tiwaliba waire mulala ku bo abaabona ekitiibwa kyange n’ebyamagero byenakolera e Misiri ni mu idungu aye ni bandeemera nibangezesa emirundi ikumi, tiwaliba waire mulala ku bo alibona ensi yenasuubiza ba daada baibwe nga ndayira. Aye olw’okuba omuweereza wange Kalebu alina omwoyo gwa ndawulo era angoberera n’omwoyo gwe gwona gwona, ndimutuusa mu nsi yeyajamu, era abaidukulu be baligisika. Mpegano mukyuke muire einuma muyolekere eidungu nga mugoberera enjira eja ku nanda emyufu.”

Kale abasaada Musa be yatuma okuziga ensi, nibaira nibaleetera abantu okwemuluguniza Musa nga basasaania ebigambo ebibi baitibwa ekikoligo mu maiso ga Mukama. Ku basaada abaaja okuziga ensi, Yoswa ni Kalebu bonka n’abaawona. Musa bweyategeeza aba Isirayiri boona boona ebintu bino, baakuba ebiwoobe.

Kale aba Isirayiri bairayo einuma okwolekera eidungu yebaabungeetera emyaka amakumi ana, mwaka mulamba olwa buli lunaku abakeesi lwe baamala nga bakeeta Kanani era buli muntu ow’emyaka abiri n’okusoba baafiira mu idungu.